Asturies empaca p’An Oriant

A namás unos díis pa qu’entame el mayor festival folk d’Europa, el Festival Intercélticu d’An Oriant (Lorient), la muerganización, con Jesús Adrián Rodríguez Álvarez al frente, tien bien preparada una gran ufierta tantu de sidre, gastronómica y d’espectáculos.

Hebio delles novedaes con respeutu a años previos, comu ye’l cambeu de sidra Trabanco por sidra ñatural del llagar Contrueces. Amás de sidre, nel festival podrá tastiase la cerveza xixonesa artesanal Scone aparte de llicores de man de Monasterio de Corias, sicasí la sidre siguirá siendo la protagonista dientru la carpa d’Asturies tal y comu esperen los nuesos visitantes.

Lo que nun esperen de xuru ye la decoración qu’Adrián mos tien preparada, con una Cruz de la Victoria de cuásique dos metros que simboliza a la perfeición la bandera de nueso. Por si esto fuere pocu, amás la decoración l’interior ta de man del artesanu Pereda d’El Berrón, amosando delles obres tradicionales de maera feches a man comu amueses de la cultura asturiana. Por dar un exemplu, cabe citar una puerta d’horru de na menos que 100 años d’antigüedá.

Nel ámbetu l’entretenimuentu, el grupu folk residente d’esti añu nel festival intercélticu sedrá’l grupu asturianu Melandru, cuyu gaiteru dellos remembrarán por ser el direutor de la Banda Gaites Ribeseya.

Too esto faise posible gracies al bultable trabayu d’Adrían, el so profesional equipu y al sofitu incondicional de la Delegación Asturiana n’An Oriant asina comu’l del “Principado”.

Pero dientru les novedaes, la que más llama l’atención ye una collaboración que se fadrá cola Fundación Asturies XXI, presentándose la prósima edición del Salón Internacional de les Sidres de Gala (SISGA) faciendo una serie de tasties de sidre asturiano ya internacional dientru la carpa d’Asturies pa un públicu perescoyíu. Demientres estes tasties, de baldre dafechu, los asistentes conocerán les destremaes particularidaes de les sidres de ca país, daranse-yos les notes de tastia y prebarán lo meyor de les sidres asturianes que más gallardones algamaren a nivel internacional, tantu ñatural comu brut, axampanao y sidre de xelu: Castañón, Cortina, La Naveta, Riestra y Viuda de Angelón. Sidre de siete países a conocer y esfrutar.

Por si vos faltaben alicientes pa venir a An Oriant, esti añu más que nunca la música y la sidre van de la man.