Entamu LA SIDRA 191 (Payares’19)

Entamu

Sidre y castañes, tamos en tiempu de magüestos, gratificante espresión de la nuesa cultura sidrera pa toles edaes que non siempres recibe la reconocencia que merez. En cualisquier casu los magüestos multiplíquense per tola xeografía asturiana de forma espontánea y gocien de bona salú.

Esti añu toviemos una bona collecha de mazana –como marca la vecería pa los años impares- y les condiciones meteorolóxiques permitieron que la mazana aguantara nel árbol y consiguiera un bon volume y la maduración correcha. Por too ello cabe camentar que la sidre va ser especialmente bona, y nello tán trabayando los llagares, que tán mayando demientres tou esti mes, y rellenando tinos y toneles a la espera d’una correcha formientaura que consiga esa sidre cola qu’allegramos el cuerpu y l’alma.
Anque la collecha fuera bona, ye’l momentu de recordar qu’a estes altures entá nun se consiguió superar el fenómenu de la vecería, que por más que los pumareros van profesionalizándose, sigue echándose en falta’l necesariu sofitu istitucional pa implantar téuniques efeutives que pongan les nueses pumaraes nel sieglu XXI y consigan una produción regular añu ente añu, tal como asocede na práutica totalidá de les pumaraes europees.

Nesti sen, y una vegada más, tornamos a reclamar la necesidá d’un Plan Estratéxicu pa la Sidre y la Mazana que contemple, ente munchos otros, esti problema y especifique una sistemática y un protocolu d’actuación, con programación temporal y los necesarios medios téunicos, humanos y económicos. El futuru del seutor depende en bona midida de la esistencia d’esti plan estratéxicu, y la dexadez institucional al respeutu resulta, cuantimenos, indesplicable.

Otra manera, a entamos del mes que vien empecipia a cellebrase Asturies Brut, una iniciativa de la DOP sidre d’Asturies, cola que pretende impulsase la conocencia y consumu de la nuesa sidre brut, na que participen seyes llagares y que cunta cola animosa implicación de la hostelería asturiana.

Van averándose les fiestes navidiegues, y agora ye’l momentu de dir plantegándose cómo van ser les nueses meses nes cellebraciones vinientes. Nel pasáu Salón Internacional de les Sidres de Gala toviemos la oportunidá de conocer les múltiples espresiones de la sidre, tantu n’ Asturies como a nivel internacional, y quedó nidio que les posibilidaes son munches pa complementar los menús navidiegos ¡que nun quede por nós!