Entamu
L’ésitu del XIV Salón de la Sidre d’Asturies cellebráu’l mes pasáu, marca en bona midía l’actualidá d’esti mes. Toviemos la oportunidá de prebar sidres d’una calidá poco avezada, dalgunes, eso sí, difíciles d’atopar nel mercáu, pero toes elles con unos niveles d’escelencia que, nun va muncho, paecía imposible llograr. La nuesa felicitación a los llagareros y a la DOP.
Esti mes de xunetu preséntase -cómo non- con una impresionante ufierta sidrera, tantu no que se refier específicamente a la sidre como a los eventos que la tienen como protagonista principal. Les cellebraciones asocédense y trunfen, con especial mención por supuestu a les que son de sidre casero, un fenómenu social que va alquiriendo ca vegada mayor notoriedá, y que ye toa una garantía de pervivencia y desendolcu pa la cultura sidrera asturiana y de dalguna manera referencia obligada frente a sidres industriales normalmente d’alta calidá, pero na que s’echen de menos saborgos y arumes qu’entá podemos atopar en munches sidres caseres.
La situación pudiera paecer idílica, pero nun hai que llamase a engañu. Siguimos sufriendo una inxustificable desatención institucional. Paez que’l llograr la reconocencia internacional per parte de la UNESCO nun sirvió a los nuesos representantes políticos más que para faese semeyes, atribuyise méritos y emitir mensaxes optimistes. Esperamos midíes concretes. Midíes que faciliten el caltenimientu y desendolcu de la cultura sidrera asturiana. Facilidaes económiques, burocráticu-alministratives, iniciatives institucionales, programes de desendolcu, planificación a curtiu y mediu plazu… Toi eso que-y compete a políticos ya instituciones y que, cola salvedá de dellos conceyos, nun se ta dando.
Llama l’atención, por casu, qu’eventos festivos multitudinarios que vienen entamar a Asturies -Metrópoli, Boombastic… por citar dalgunos-, puedan recibir autorización ya inclusive sofitu económicu per parte d’instituciones asturianes, ensin que se-yos desixa como condición imprescindible la presencia de la sidre -nes sos diverses manifestaciones- en condiciones non discriminatories respeutu al restu de bébores que s’ufierten al públicu. La cultura asturiana de la sidre tien que tar presente y prosperar en tolos espacios sociales, culturales y festivos del nuesu país, y ye responsabilidá institucional garantizalo.
El dinamismu de la sociedá asturiana y el so compromisu cola sidre y la so cultura ye fundamental, pero’l sofitu institucional ye obligáu.
