Revista LA SIDRA y la Fundación Asturies XXI donen un cartelu hestóricu al Muséu del Pueblu d’Asturies

Foi atopáu en Santa Cruz de Tenerife y data de 1913, amás, el colleicionista Manuel Preseo donó otru más de 1920.

LA SIDRA.- La promoción de la cultura sidrera asturiana, -incidimos “cultura sidrera asturiana” porque lo de “asturiana” ye importante-, ye ún de los oxetivosprimordiales de la Fundación Asturies XXI y de la revista LA SIDRA. D’ende que quinxéremos qeu’l Muséu del Pueblu d’Asturies incremente la so colleición con un cartelu atopáu en Santa Cruz de Tenerife. “Ta datáu haza 1913, anuncia la sidre “La Aldeana”, ellaborada pola sociedá “Casas, Muñiz y Crosa”, de Xixón. La marca rexistróse en 1913 col calificativu publicitaru de “la reina de las sidras”. El cartelu qu’acaba incorporar el muséu a la so colleición mide 88 x 64 cm y foi impresu na Litografía Muñiz, fundada en Xixón en 1906. El Muséu del Pueblu d’Asturies conserva d’esta llitografía numberoses etiquetes y endolcos, pero fasta agora nun tenía dengún cartelu” siñaló Joaquín López Álvarez, direutor.

L’otru cartelu, donáu pol colleicionista Manuel Presedo, anuncia la Sidra champagne de la sociedá Valle, Vallina y Fernández de Villaviciosa,. “Esta sociedá dio a la publicidá muncha importancia dende’l so aniciu y rializó nes primeres décades del sieglu pasáu numberosos cartelos, dellos de gran tamañu, que formen parte de la colleición del Muséu del Pueblu d’Asturies. Esti que s’incorpora agora al muséu caltién la imaxe de les marques de fines del sieglu XIX y ye una pieza mui rara” desplicó López y amestó: “cola incorporación d’estos dos cartelos el muséu enriquez la so colleición y, n’especial, va acrecentando testimonios de la hestoria de la sidre; bébora que, per una parte, ye una actividá rellevante na economía asturiana y clave, xunto col llechi, na modernización del campu, y, perotra, ye una seña d’identidá d’Asturies, en bona parte gracies a los emigrantes, sobro too d’asturianos n’América, que la convirtieren n’ún de los símbolos del país”