Hospitalidá ya identidá llocal, puntos fuertes de les empreses turístiques de Xixón, como los chigres

Les 257 empreses que cunten col sellu Compromisu de Calidá Turística superaron con un notable les evaluaciones de serviciu

LA SIDRA.- La hospitalidá y la ufierta de productos de calidá y con identidá llocal —como ensin dulda ye la sidre— son los puntos fuertes de les 257 empreses y servicios turísticos de Xixón que cunten col sellu Compromisu De Calidá Turística. Asina s’esprende de les evaluaciones del llamáu “veceru misteriosu”, esixencia del programa de calidá que busca faer de la ciudá un destín turísticu competitivu.

Ca añu, un veceru anónimu visita los hoteles, chigres, restoranes, comercios, taxis y otres actividaes qu’atienden a los turistes de Xixón y detecta los puntos fuertes y les oportunidaes de meyora nes istalaciones y nel serviciu emprestáu per ca negociu. La valoración global media algamada esti añu asítiase ente’l 7,4 y el 8,5 sobro un total de 10 puntos.

Al respective de la prestación del serviciu, los puntos fuertes son l’acoyía realizada pol presonal a la llegada del veceru al establecimientu, lo que refuerza la hospitalidá del destín, y la calidá y variedá de la ufierta, incluyendo productos de la fastera, con identidá llocal o del país. Per otru llau, les oportunidaes de meyora son reforzar el siguimientu de la sastisfaición del turista demientres la so estancia nel negociu y ufiertar más y meyor información, tanto de los servicios del propiu establecimientu como información turístico del destín.

Dientru les 257 empreses y servicios turísticos que cunten col sellu Compromisu de Calidá Turística, los rellacionaos cola sidra son: Parrilla Muñó Poniente, El Restallu, Sidra Acebal, Sidra Piñera. Sidra Trabanco, El Requexu, Casa Ataulfo, El Llavianu, La Fueya de Tomás, La Tonada, Llagar de Castiello Bernueces, Marisquería Sidrería Poniente, Sidrería L’Encruz, Parilla Ramón, Sidrería El Sabugu, Tierra Ástur Poniente, Sidrería La Mariña, Restorán Asturianu La Galana, Bellavista y La Delicies.