El XVI Salón Internacional de les Sidres de Gala presentó güei na Casa Conceyu de Xixón les impresionantes cifres de la so edición de 2026: 311 productos procedentes de 117 llagares de 35 países. Pelos datos públicos comparables revisaos de los principales alcuentros internacionales, nunca un salón sidreru documentó una concentración asemeyada de productores, lo que convierte al SISGA’26 na mayor edición de la so hestoria y nel mayor salón internacional de sidre documentáu hasta agora.
LA SIDRA.- Baxo l’atenta y diríamos qu’arguyosa mirada de Jovellanos, nel Salón de Receiciones de la Casa Conceyu de Xixón, la Fundación Asturies XXI presentó esti llunes el XVI Salón Internacional de les Sidres de Gala (SISGA’26), que del 24 al 27 de setiembre va convertir otra vuelta Xixón nun puntu d’alcuentru de la cultura sidrera internacional.
Pero nesta ocasión hai un elementu que fai de la edición daqué verdaderamente escepcional. El recuentu definitivu amuesa unes cifres ensin precedente nel propiu SISGA y que, comparaes colos datos públicos de los grandes alcuentros internacionales, asitien al salón asturianu nuna dimensión hasta agora non documentada que permite falar d’un SISGA de récord mundial: dientro de los grandes salones y alcuentros internacionales con cifres públiques comparables localizaes, 117 ye la mayor participación de productores documentada hasta agora. Y hai un segundu datu igual d’impactante: 35 países nuna mesma edición, una diversidá xeográfica mui superior a la rexistrada nes principales cites analizaes.
L’actu abrióse cola intervención de Guzmán Pendás, conceyal delegáu de Servicios Sociales, Vivienda y Cooperación del Conceyu de Xixón, quien destacó la dimensión algamada pol SISGA tres dieciséis años, agradeciendo a la Fundación Asturies XXI el gran esfuerciu humanu y lloxísticu que supon sacar alantre una convocatoria d’estes carauterístiques.
Pendás resumió l’espíritu d’esta edición en dos idees: el SISGA va crear “sinerxia y xermandía” ente territorios sidreros y va ser un salón capaz de xunir tres continentes, les sos cultures, los sos productores y representantes institucionales de distintes ciudaes y países.
La presencia institucional internacional ye, precisamente, una de les dimensiones que’l SISGA foi incorporando al so modelu a lo llargo de los años, superando’l formatu d’una simple feria de productos.
Carme Pérez, vicepresidenta de la Fundación Asturies XXI, foi quien puso sobre la mesa la magnitú d’esta edición “rompimos tolos récords”.
Pérez destacó la procedencia de productos d’América, Asia y una amplísima representación europea y señaló que tanta diversidá va poner Xixón y Asturies nel epicentru mundial de les sidres modernes, innovadores y de nueves espresiones.
Pero tamién quixo dexar claro que’l SISGA nun ye namás una sucesión de botelles y tasties. L’ADN del eventu ye xunir productores “dende la mazana a la botella” y incorporar alredor d’ellos gastronomía, turismu, cultura gastronómica, intercambiu profesional y cooperación internacional.
Esa concepción ye la que foi dando orixe a proyeutos que güei tienen vida propia, como Cider Cities y la so espansión internacional o’l proyeutu européu CIDEREU.
Antonio Migoya, de la Fundación Caja Rural de Xixón, recordó’l llargu camín percorríu y la collaboración caltenida ente dambes fundaciones. Entamó con una frase sencilla: dieciséis años yá son, por ellos mesmos, un númberu d’éxitu, y llegó a definir la convocatoria como un eventu de máxima trescendencia dientro del mundu de la sidre.
Migoya centró buena parte de la so intervención na importancia económica del sector sidreru y, sobre manera, nel valor del intercambiu ente productores. “De salir de casa siempres s’aprende daqué”, vino resumir, porque conocer otres formes de producción, otros mercaos y otros modelos permite a los llagares llevar idees nueves a les sos propies empreses.
D’ehí la segunda idea que quiso dexar: lo que cada productor vea facer a otros nel SISGA puede aplicalo dempués, a la so manera, nel so propiu llagar, consiguiendo que l’alcuentru internacional tenga una utilidá directa pal sector asturianu.
Álvaro Alonso, en representación de la Cámara de Comerciu de Xixón, felicitó a la Fundación Asturies XXI pol trabayu acumuláu y destacó dos dimensiones concretes del Salón. La primera ye económica: tener mientres estos díes en Xixón representantes de 35 países colos sos productos supón un importante impulsu pa l’actividá ferial y económica de la ciudá. Alonso destacó tamién l’aciertu d’integrar una parte importante del SISGA nel marcu d’AGROPEC, sumando dos acontecimientos y aprovechando’l potencial del recintu Ferial.
La segunda ye territorial ya internacional. Recordó’l crecimientu de la rede europea de ciudaes sidreres, que va celebrar los sos órganos de gobiernu coincidiendo col SISGA, y destacó la oportunidá de facer de Xixón una capital de la sidre a nivel mundial, non namás européu.
P’Alonso, el valor ta en sumar les sinerxies de les ciudaes, el productu y el sector primariu, una estratexa que la Cámara considera non solo una oportunidá, sinón tamién una responsabilidá na que va siguir implicada.
La gastronomía ye otra de les pates esenciales del SISGA. Pedro Baldó, del restorán Finca El Duque, avanzó parte del trabayu gastronómicu que va acompañar al concursu y, sobre manera, el Brunch de Gala del domingu.
El plantegamientu parte d’una premisa clara: “too lo que vamos facer va tar centráu nos productos asturianos de la nuestra tierra”, pero interpretaos dende una cocina actual y pensada pa acompañar les nueves formes de sidre.
Baldó resumió esa evolución con otra idea especialmente significativa: la sidre ta evolucionando, tien mercaos nuevos y tien formes nueves de bebese. Y añadió que Asturies tien profesionales capaces de tar a la cabeza d’esos cambios y de buscar nuevos mercaos y nueves ellaboraciones.
Presllando les intervenciones, el presidente de la Fundación Asturies XXI, Marcos Abel Fernández, encargóse d’encuadrar les cifres dientro de la dimensión internacional algamada pol proyeutu.
Fernández calificó’l resultáu como “un éxitu impresionante” y destacó lo que significa ser capaces d’axuntar en Xixón una concentración de productores superior a la que presenten munchos de los eventos internacionales más reconocíos. La intención, aclaró, nun ye convertir la sidre nuna competición ente certámenes, sinón ser conscientes de lo que s’algamó y poder dicir que güei’l SISGA ta a la cabeza.
La segunda idega foi más allá de les cifres: “tamos agora mesmo liderando tol procesu y tol proyeutu internacional alredor de les sidres”. Pa Fernández, tener tantos productores xuntos significa confrontar formes distintes de cultivar mazana, producir, ellaborar, vender y entender empresarialmente la sidre, convirtiendo’l SISGA nun enorme espaciu d’aprendizaxe mutuu.
La evolución internacional que describe Fernández pudo vese na participación de la Findación en practicamente tolos certámenes internacionales d’importancia a nivel sidreru y nos contactos que’l sector asturianu vien desenvolviendo n’otros grandes foros sidreros.
El sábadu, el SISGA ye de tol públicu
De tol ampliu programa, la cita fundamental pa quien quiera vivir directamente esti SISGA históricu va ser el sábadu 26 de setiembre, cuando’l Salón abra les puertes al públicu.
La Tastia Abierta al Públicu va celebrase nel Salón Asturias del Palaciu de Congresos del Recintu Ferial Luis Adaro, en Xixón, coincidiendo cola celebración d’AGROPEC. Va haber dos sesiones, de 12:00 a 15:00 y de 17:00 a 20:00 hores. La entrada cuesta 10 euros y con esa entrada, el públicu va poder:
Tastiar les sidres internacionales participantes disponibles, conocer personalmente a los llagareros y falar con ellos de los sos productos; esfrutar d’harmonizaciones con Alimentos del Paraíso; y mercar directamente sidres participantes cuando tean disponibles. Amás, van celebrase seis tasties guiaes, con un máximu de 20 places caúna y un preciu adicional de 5 euros.
Nun se trata, por tanto, simplemente d’una esposición. Va ser la oportunidá de tener nun mesmu espaciu sidres de decenes de territorios del mundu y a los propios productores detrás d’elles, conocer formes d’ellaboración radicalmente distintes y percorrer, copa en mano, bona parte del actual mapa sidreru mundial.
Ye’l momentu nel que’l récord de 311 productos, 117 llagares y 35 países dexa de ser una cifra y conviértese nuna esperiencia abierta a la ciudadanía.
Y ye tamién la meyor forma de dimensionar lo que Xixón va acoyer esta selmana: la mayor edición del SISGA, el mayor salón sidreru documentáu hasta agora y una concentración de cultures de la sidre ensin precedentes.
