El Salón Internacional de les Sidres de Gala despide la so decimosesta edición dempués de cuatro díes d’intensa actividá profesional y divulgativa, marcaos pola dimensión internacional, la gran afluencia de públicu na Tastia Abierta y l’interés despertáu poles conferencies, alderiques y tasties especializaes. La organización va espublizar en breve la llista definitiva de sidres distingüíes nos Premios SISGA 2026.
El 16º Salón Internacional de les Sidres de Gala, SISGA’26, pieslla una edición que confirma’l xorreciente pesu internacional del alcuentru y la capacidá d’Asturies pa furrular como puntu de referencia de productores, profesionales y aficionaos a la sidre procedentes de mui distintos territorios.
La web oficial del Salón recueye finalmente un recuentu de 323 productos, 124 llagares y 35 países y territorios participantes -tres delles incorporaciones de caberu momentu- una dimensión ensin precedentes na trayectoria del SISGA y que supera les cifres anunciaes na presentación institucional previa al alcuentru.
La presencia internacional volvió ser una de les grandes señes d’identidá d’un Salón nel que convivieron sidres asturianes con producciones procedentes d’Europa, Asia, América, mostrando una diversidá extraordinaria d’estilos, variedaes de mazana y formes d’ellaboración.
Ún de los momentos más destacaos de la edición foi la Tastia Abierta al Públicu del sábadu 26, cellebrada nel Palaciu de Congresos del Recintu Ferial Lluis Adaro de Xixón.
La gran afluencia de públicu a lo llargo de les sesiones de mañana y tarde confirmó l’interés creciente por conocer sidres d’otros países y estilos que davezu nun son fáciles d’atopar n’Asturies. La fórmula permitió al públicu tastiar directamente les sidres participantes, falar colos propios productores y conocer de primera mano les característiques y métodos d’ellaboración de cada productu.
La Tastia Abierta desenvolvióse en dos sesiones, de 12:00 a 15:00 y de 17:00 a 20:00 hores, y completóse con un programa de tasties guiaes dedicaes a producciones de Xapón, Euskal Herria, Chequia, Italia y Francia, amás d’harmonizaciones con productos d’Alimentos del Paraísu comu choscu de Tineo, quesu cuayáu de Peñamellera, salchichón de xabaril, casadielles y quesu d’Afuega’l pitu.
Pero’l SISGA nun foi únicamente un escaparate de productos. La parte profesional, formativa y d’alderique volvió tener un pesu central nel programa.
Ún de los principales espacios d’alcuentru tuvo llugar nel Muséu de la Sidra d’Asturies, en Nava, cola mesa redonda Eventos internacionales de la sidra, na que participaron representantes d’Asturies, Madeira, Xapón, Canarias, Chequia, Galicia, Chile y la rede Cider Cities. L’alderique sirvió pa poner en común esperiencies sobre promoción internacional, cooperación ente territorios y formes de reforzar la visibilidá de la cultura sidrera.
La visita a los llagares de Cortina, Piñera y El Gaitero, asina como la cellebración d’espiches y alcuentros en sidreríes valieron pa treslladar la cultura asturiana de la sidre a los participantes.
La edición incluyó igualmente l’Asamblea anual de Cider Cities, celebrada na Cámara de Comerciu de Xixón, reforciando la vinculación del SISGA coles redes internacionales de territorios sidreros.
El vienres 25 concentróse otra de les pieces fundamentales del Salón: el trabayu del Xuráu Internacional de los Premios SISGA, cola cata, deliberación y puntuación de les sidres presentaes al concursu.
La enorme variedá de productos presentes nesta edición obligó a trabayar con un ampliu espectru de categoríes, dende sidres de copa y d’espolleta hasta sidres de pera, sidres de xelu y fueu, llicores, aguardientes, vermús, productos ensin alcohol y sidres saborguizaes.
La entrega de distinciones tuvo llugar nel Brunch de Gala del domingu 27 na Finca El Duque, en Castiellu, Xixón, una cita que combinó gastronomía y sidres internacionales y que sirvió tamién como actu de clausura de la edición. El programa incluyó igualmente la reconocencia a los Embaxadores del SISGA y el nomamientu de nuevos representantes.
La relación completa y definitiva de sidres premiaes nos Premios SISGA 2026 va espublizase en breve, una vez rematada la revisión y ordenación final de los resultaos del concursu.
El pieslle del 16º SISGA dexa, sicasí, una conclusión clara: el Salón consolidó esta edición la so triple vertiente. Per un llau, como escaparate d’Asturies cara al mundiu, per otru espaciu profesional de referencia pa productores y especialistes y per otru más, como una gran ventana abierta a la ciudadanía, capaz d’averar a Xixón sidres y cultures sidreres procedentes de tol mundu.
La combinación de participación internacional, alta presencia de públicu, alderique profesional, formación, gastronomía y cultura sidrera volvió facer del SISGA un puntu d’alcuentru difícil d’atopar n’otru contestu, con Asturies como centru d’una rede sidrera cada vegada más amplia y conectada.
