Güei ye’l díi: ven a conocer la sidra de too el mundu na Tastia Abierta del SISGA

La Tastia Abierta al Públicu del Salón Internacional de les Sidres de Gala, con más de 200 productos sidreros de tol mundu, llega tres una intensísima xornada sidrera na que’l xuráu escoyó les meyores sidres  internacionales, Xixón recibió a los alcaldes de les ciudaes más sidreres, presentáronse les sidres de Portugal, Lituania, Letonia y Madeira, y visitáronse les sidreríes y llagares de la ciuda

Por fin llega l’esperáu día en que tolos asturianos van poder probar la sidra’l mundu: la Tastia Abierta al Públicu, una de les xornaes clave del Salón Internacional de les Sidres de Gala, na que llagareros llegaos de decenes de países, xuntu colos asturianos, dan a conocer los sos productos al gran públicu.
Esta xornada ufierta la posibilidá de conocer la variedá sidrera esistente a nivel mundial y los asistentes non solo van poder tastiar los productos presentaos, sinón que tamién van tener la oportunidá d’entamar contautu colos mesmos llagareros, que-yos esplicarán el procesu d’ellaboración, les cualidaes organolépticas de caúna de les sidres y les sos posibles harmonizaciones.

Tamién los llagareros asturianos tienen sorpreses para quien allegue a la prueba con formatos y propuestes sidreres innovadores dientro la tradición sidrera asturiana. Como novedá esti añu, una y bones l’eventu ta integráu en AGROPEC, l’accesu al espaciu onde tien llugar la Tastia Abierta va ser gratuitu, de manera que quien quiera acercase va poder ver la variedá de la ufierta sidrera.
Pa amás probar les sidres hai dos opciones: l’avezada de mercar un pase pa probar la sidra que se quiera -n’horariu de 11 a 15 y de 17 a 20 hores-, con un preciu de 10 €; o bien pagando cada consumición a 2 €.
Asina mesmu, va haber la posibilidá de mercar sidra directamente a los llagares participantes y d’esfrutar d’una esposición de mazana de sidra DOP a cargu del Club Sierense d’Amigos de la Mazana -CSAM- o visitar los espositores de dalgunos de los miembros de la Rede Europea de Ciudaes de la Mazana y la Sidra -Cider Cities-.
Per otru llau, mientres la Cata abierta al públicu realizaránse charres y cates guiaes de 30 a 40 minutos, presentándose sidres de Xapón, Asturies, Escocia, Euskal Herrria y Chequia.
Pa presllar la xornada vamos llevar a la nuesa delegación internacional a conocer el Llagar de Piñera, onde se celebrará una espicha.

Horarios:
11:00 a 15:00 h. Degustación Abierta al Públicu 
12:00 a 12:45 h Tastia de Sidra con Cannabis, al cargu de Benitu Peziña Llagar Kuartango. Euskal Herria 13:00 a 14:00 h. Tastia empuesta llagar Cidérka al cargu de la llagarera Zuzana Kameníková. Chequia
17:00 a 20:00 h. Tastia Abierta al Públicu 
17:00 a 17:45 h. Tastia guiada sidra xaponés a cargu del llagareru Tatsuro Fuji, de Fukiware Cidrerie
18:00 a 18:45 h. Tastia guiada de Sidra Exner a cargu del llagareru Daniel Exner. Asturies
19:00 a 19:45 h. Tastia guiada llagar Seidear a cargu del llagareru Christian Stolte. Escocia 
21:30 h. Espicha de Xermandía. Llagar Piñera (Deva, Xixón)