El Paséu Gastro, preséntase ensin sidre y con crítica vecinal enantes del so entamu
LA SIDRA.- A pocos díes del entamu del eventu conocíu como “Paséu Gastro”, que va cellebrase ente’l 6 y el 17 d’agostu, xurden crítiques pola ausencia prevista de sidre asturiana nel mesmu, asina como pola falta de conexón col texíu vecinal. Asociaciones vecinales y colleutivos culturales cuestionen un modelu d’eventu que quita protagonismu a los productos del país y privatiza espacios públicos ensin cuntar cola vecindá.
“Nin una botella de sidra, nin un llagar, nin una referencia a lo nueso. Asina nun se pue falar de gastronomía asturiana, sinón d’un escaparate de postureu”, declaren dende colleutivos ciudadanos. Eso sí, habrá una ventena de vinos y otru tantu de cerveces, arriendes de cócteles, vermús y refrescos variados… pero ensin sidre.
La sidre, reconocida como Padremuñu Cultural Inmaterial pola UNESCO, ye parte esencial de la identidá d’Asturies. Dexala fuera d’un eventu gastronómicu n’Asturies ye, como apunten dende distintes voces, “una falta de respetu cultural y una oportunidá perdía pa dar visibilidá a productores llocales”.
Precisamente, l’entamu de la revista LA SIDRA del mes de xunetu apuntaba que: “Llama l’atención, por casu, qu’eventos festivos multitudinarios que vienen entamar a Asturies -Metrópoli, Boombastic… por citar dalgunos-, puedan recibir autorización ya inclusive sofitu económicu per parte d’instituciones asturianes, ensin que se-yos desixa como condición imprescindible la presencia de la sidre -nes sos diverses manifestaciones- en condiciones non discriminatories respeutu al restu de bébores que s’ufierten al públicu. La cultura asturiana de la sidre tien que tar presente y prosperar en tolos espacios sociales, culturales y festivos del nuesu país, y ye responsabilidá institucional garantizalo.”
Per otru llau, vecinos de Cimavilla y del centru urbanu manifestaron yá’l so malestar pol ruiu esperáu, la ocupación del espaciu públicu ensin avisu y la carencia de participación ciudadana na planificación del eventu. Dende asociaciones culturales propónense formatos alternativos que tornen el protagonismu a la sidre, respeten l’espaciu común ya incorporen al texíu vecinal.
“Si falamos de cultura gastronómica, nun se pue facer ensin la sidre. Y menos en Xixón.“
