La delegación asturiana yá ta n’An Oriant pa participar nuna nueva edición del Festival Intercélticu, la gran cita internacional de les naciones celtes que convierte la ciudá bretona nun puntu d’alcuentru pa la música, la cultura y les tradiciones del Arcu Atlánticu. Hasta’l 10 d’agostu, Asturies volverá amosar la so riqueza cultural con una programación que combina conciertos, promoción turística y gastronomía.
La presencia asturiana va tar protagonizada por una destacada representación d’artistes y músicos, ente los que figuren Alienda, Bada & Muñalén, Eva Tejedor y Les Pandereteres, Guieldu, Marisa Valle Roso, Pablo Carrera, Rubén Bada, La Reina del Truébanu y la Banda Gaites San Félix de Candás, que van llevar la música tradicional y contemporánea asturiana a los distintos escenarios del festival.
Amás de la programación musical, Asturies vuelve apostar pola promoción del país como destín turísticu y gastronómicu. La sidra, reconocida internacionalmente como unu de los principales símbolos de la cultura asturiana, va ocupar un llugar destacáu xunto a los productos identificaos cola marca Alimentos del Paraísu Natural, nun espaciu concebíu pa dar a conocer la calidá de la producción agroalimentaria asturiana.
El Festival Intercélticu d’An Oriant ye unu de los escaparates culturales más importantes d’Europa. Cada branu reúne a miles de visitantes y a cientos de músicos procedentes de Bretaña, Escocia, Irlanda, Gales, Cornualles, Galicia, Asturies y otros territorios de tradición celta, convirtiendo les sos cais nun auténticu escenariu al aire llibre onde la música y la cultura tán presentes a lo llargo de tol día.
La participación asturiana nel festival consolidóse nos últimos años como una de les más actives. La presencia continuada de músicos, agrupaciones folclóriques y representantes institucionales reforzó los venceyos históricos ente Asturies y Bretaña, favoreciendo tamién nuevos intercambios culturales y artísticos que van más allá de los díes del festival.
Les primeres actuaciones y actividaes d’esta edición van sirvir pa comprobar, una vegada más, el bon momentu que vive la música tradicional asturiana y la so capacidá pa conectar con públicos bien distintos. Nos próximos díes, la delegación del Principáu va participar en conciertos, alcuentros institucionales y actos promocionales que volverán dar visibilidá internacional a la cultura asturiana.
