Villaviciosa acoyó esti miércoles 22 d’abril la presentación oficial de la XXXIII edición del Campeonato Oficial de Echaores d’Asturies. L’actu cellebróse na sede del Conseyu Regulador de la DOP Sidra d’Asturies y valió pa dar a conocer les principales novedaes y el calendariu d’una de les competiciones más emblemátiques del mundu sidreru.
La presentación tuvo conducida pol xerente de la entidá, Daniel Ruiz; el presidente de l’Asociación de Echaores d’Asturieas, Saúl Moro; l’alcalde de Villaviciosa, Alejandro Vega; y el director de la oficina de Caja Rural de Asturies en Villaviciosa, José Ramón Alonso.
Al actu asistieron tamién Llucía Fernández, en representación de la revista LA SIDRA; dellos participantes nel campeonatu, ente ellos l’actual campeón Salvador Ondó, y les echaores Alejandra Vanegas, Isabella Padrón y Sandra Martínez, amás de los miembros del xuráu Abraham Castellanos y Nicolás Expósito. Per parte de Caja Rural d’Asturies tamién acudió Martín Lebón, responsable del sector agrariu.
Tanto l’Ayuntamientu de Villaviciosa como Caja Rural reiteraron el so compromisu cola competición, destacando que se trata d’un eventu que refuerza la identidá y la tradición asturianes y que representa una pieza clave de la cultura’l país.
Novedaes d’esta edición
La nueva edición incorpora dellos cambeos destacaos. Amás de sumase una nueva prueba al calendariu, Lorena Alonso, técnica responsable del club de productu Sidraturismu Asturies, va encargase de presentar cada xornada y de reforzar la visibilidá del campeonatu nes redes sociales.
Tamién s’alcordó estudiar la posibilidá de destacar a la sidrería ganadora de cada prueba y reconocer con diploma al segundu y tercer clasificáu de cada cita na categoría Sub 25, padrocinada pola revista LA SIDRA.
Dieciocho pruebes per toa Asturies
El campeonatu va tar formáu por 18 pruebes, con una nueva cita n’Argüeru, prevista p’agostu en fecha entá por confirmar. La primer parada va celebrase esti próximu sábadu 24 d’abril en La Felguera.
El restu del calendariu va percorrer Cabranes (8 de mayu), Llanera (16 de mayu), Gascona (9 de xunu), Mieres (18 de xunu), Nava (12 de xunetu), Llugones (3 d’agostu), Navia (8 d’agostu), Llanes (9 d’agostu), Tapia (18 d’agostu), Xixón (20 d’agostu), Corvera (12 de setiembre), Pola Siero (20 de setiembre), Villaviciosa (22 de setiembre), Ribeseya (4 d’ochobre), Les Arriondes (8 de payares) y Colunga (7 d’avientu).
Xuráu y sortéu del vasu prietu
Laura Ovín va exercer esti añu como presidenta del xuráu, que va contar con cuatro campeones históricos —y unu más como suplente— pa valorar les actuaciones de los participantes.
Mientres la presentación celebróse tamién el sortéu de les cuatro pruebes nes que va utilizase’l tradicional vasu opacu. Les sedes escoyíes fueron Navia, Tapia, Villaviciosa y Gascona.
