La capital financiera d’Alemania convirtióse esti mes nun de los centros mundiales de la cultura sidrera cola celebración de los Cider World Awards 2026, un de los certámenes internacionales más conocios del sector. La gala, celebrada en Frankfurt, aconceyó productores de dos continentes y volvió confirmar la puxanza creativa d’una bébora ca vegada más diversa y valorada.
Nesta edición participaron más de 100 productos ellaboraos por más de 50 productores procedentes de 14 países.
Una de les principales novedaes d’esti añu foi la incorporación de la categoría “Sparkling Perry”, dedicada a productos esplumosos ellaboraos con pera. La organización destacó con ello la intención de dar más visibilidá a esti tipu de productos, qu’anguañu viven un momentu de creciente reconocencia internacional.
La gala tuvo presentada pol divulgador británicu Gabe Cook, una de les figures más conocíes del mundu sidreru, y sirvió tamién pa reconocer la trayectoria de Haritz Rodriguez, escoyíu como Cider Star of the Year 2026 pola so llabor de promoción de la cultura sidrera vasca y de la conexón ente rexones productores.
Los productos premiaos y el restu de participantes presentáronse depués na Cider World Expo, abierta a profesionales de la hostelería, distribuidores y públicu xeneral. El certame consolídase asina como un de los escaparates mundiales pa la sidre contemporánea, onde conviven tradición, innovación y nuevos estilos.
La edición de 2026 volvió demostrar que la sidre ye una bébora global en plena evolución, con países que son productores clásicos y nuevos territorios productores apostando pola calidá y la personalidá.
Un escenariu internacional nel que la sidre asturiana, con fonda tradición y enorme nivel, tien munchu que dicir, pero nel que sicasí Asturies tornó ser la gran ausente, con namás qu’un productu presentáu a concursu y participante na muestra, Sidra de Xelu La Comuña, un productu d’ellaboración casero y calidá reconocía en dellos certámenes qu’amás consiguió un premiu oru pola so calidá.
Premios Meyor de la so triba:
Na estaya Still Ciders, el premiu foi pa RedLove Mausser Most, de Estiria (Austria).
Na categoría Sparkling Ciders, ganó Trell Sandalen Gard, de Norway.
Na nueva categoría Sparkling Perry, el ganador foi Birnensecco 2024, de Gutshof Kraatz, Brandeburgu (Germany).
Na categoría Mixed & Flavoured, el másimu reconocimientu recayó en Wilder Cider – MainSchmecker Franken, d’Germany.
Na categoría Dessert & Fortified, el premiu foi pa Elodie Ice Cider, d’Eiane Gard (Norway).
Na categoría Non-Alcoholic, venció Classic Rocco Sparkling Rocco, del Tirol del Sur (Italy).
