La Rede Europea de Ciudaes de la Sidra, Cider Cities, participa activamente nos actos de la III Fiesta de la Mazana y de la Sidra de Valdivia, celebrada na ciudá chilena de Valdivia, na Rexón de Los Ríos. L’eventu, que esti añu acueye per primer vegada la I Copa Internacional de Sidres de Valdivia, cuenta cola presencia de representantes de Cider Cities en calidá de miembros del xuráu d’esa copa, aportando la experiencia internacional en evaluación y promoción de sidres de calidá
La participación de Cider Cities na cita valdiviana enmárcase na apuesta de la rede por estrechar llazos colos territorios sidreros de tol mundu, más allá de les fronteres europees. Valdivia, cola tan rica tradición mazanera, el so entornu natural privilexáu y el creciente dinamismu del so sector sidrícola, representa xustamente’l tipu de ciudá que la rede busca incorporar al so proyectu de cooperación internacional.
Durante los díes de celebración, la delegación de Cider Cities caltuvo contactos con representantes de les autoridaes llocales y rexonales de Valdivia y Los Ríos, col oxetivu d’explorar les posibilidaes d’una futura collaboración cola rede. Neses reuniones presentáronse los fundamentos del proyectu, les sos llinies de trabayu—qu’abarquen el patrimoniu inmaterial, el turismu rural caltenible, el desendolcu económicu llocal y l’intercambiu de conocimientu ente territorios sidreros— y les oportunidaes qu’una eventual incorporación de Valdivia podría abrir pa la ciudá y pa la propia rede.
Dende Cider Cities espresóse el convencimientu de que Valdivia reúne les condiciones pa convertise na primer ciudá llatinoamericana en formar parte d’esta iniciativa, lo que supondría un finxu históricu pal sector sidrícola d’ambos continentes y un pasu firme na proyección internacional de la sidre chilena.
