Esta selmana tuvo llugar na ciudad alemana de Frankfurt l’alcuentru internacional sidreru Cider World, qu’aconceya a llagareros de 15 países. Una representación de Cider Cities viaxó hasta allí pa compartir colos asistentes la visión internacionalista d’esta rede de ciudaes, que busca integrar representantes de tol mundu xunios pola cultura sidrera.
Nel marcu de los alcuentros profesionales cellebraos en Frankfurt, la representante asturiana de la rede dirixóse a asociaciones rexonales y llagareros de distintos países pa tresmitir la voluntá d’espansión de Cider Cities. Darréu, entamóse una ronda de contactos que valió pa presentar los fundamentos del proyectu y abrir vies de collaboración con nuevos territorios interesaos en formar parte d’esta iniciativa, cara a futuros contactos oficiales con vistes a aumentar la gran familia sidrera Cider Cities.
El modelu que defiende Cider Cities articúlase al rodiu d’exes de trabayu conxuntu a nivel internacional que van dende la protección del padremuñu inmaterial sidreru hasta la promoción d’un turismu rural caltenible, dando especial visibilidá al papel de les muyeres nesi entornu y recalcando la importancia de los productores de mazana na cadena. Amás, la rede pon l’acentu nel desendolcu económicu llocal y nel intercambiu de conocimientu ente zonas productores, entendiendo la sidre non solo como productu, sinón como elementu vertebrador d’identidá y dinamización territorial
