La primer convocatoria del certame fotográficu promovíu pola Rede Europea de Ciudaes de la Sidre y la Mazana preslló’l plazu recepción con una participación elevada ya imaxes llegaes dende estremaos países europeos. Los trabayos seleccionaos van formar parte d’una esposición itinerante que va percorrer los territorios del programa CIDEREU.
El primer Concursu Internacional de Semeyes CIDEREU recibió unes 350 semeyes procedentes de toa Europa, una cifra que da cuenta del interés consiguíu por esta iniciativa na so primer convocatoria. El plazu presentación de trabayos finó’l 15 de xunetu y el resultáu va espublizase’l próximu 31 de xunetu.
El certame convida a representar por aciu de la fotografía la cultura europea de la mazana y la sidre, atendiendo tanto a los procesos productivos como a les persones, los paisaxes y les comunidaes que caltienen esti patrimoniu. Les semeyes presentaes aborden el cultivu tradicional de la mazana, el trabayu nos pumares y llagares, la producción de sidre y la función social, cultural y económica que tienen estes actividaes nos territorios rurales.
La convocatoria establez un primer premiu de 500 euros, un segundu de 200 y un premiu llocal de 100 euros. Acullá de los gallardones, una selección de los trabayos va incorporase a una esposición europea itinerante, prevista pa visitar les ciudaes y territorios participantes nel programa européu CIDEREU.
El concursu nun ye una actividá aisllada, sinón ún de los trabayos incluyíos nel bloque ‘Muyeres, Cultura y Sostenibilidá’ de CIDEREU, coordináu pol conceyu portugués de Carrazeda de Ansiães. Esta estaya busca facer visible’l papel de les muyeres nel mundiu rural, especialmente na agricultura, el cultivu de la mazana y la producción de sidre. Al rodiu de la esposición van organizase talleres, conferencies y alcuentros participativos nos que se van compartir esperiencies sobre igualdá, emprendimientu rural y sostenibilidá.
CIDEREU —Citizens united for Intangible heritage of apple and ciDEr cultuRe in Europe— ye un programa de cooperación desendolcáu nel marcu de Ciudadanía, Igualdá, Derechos y Valores —CERV— de la Unión Europea. A lo llargo de dos años contempla alcuentros internacionales, programes escolares, talleres ciudadanos, esposiciones y actividaes de tresferencia de conocencia ente diez ciudaes y territorios de seyes países. Los sos oxetivos inclúin la protección del padremuñu inmaterial, la participación ciudadana, la igualdá, el relevu xeneracional y la promoción de modelos agrarios más sostenibles.
El programa ye’l resultáu del trabayu de cooperación impulsáu pola Rede Europea de Ciudaes de la Sidre y la Mazana, Cider Cities. La iniciativa, presentada públicamente a finales de 2025, cuenta con una inversión global de 253.000 euros y va desendolcase demientres 2026 y 2027, con actividaes n’Italia, Portugal, Eslovenia, Francia, República Checa y l’Estáu español. La presentación del proyeutu CIDEREU permitió esplicar la dimensión europea del programa y el papel coordinador de la Fundación Asturies XXI.
La participación conseguida nel concursu proporciona agora un archivu gráficu ampliu y plural sobro la cultura sidrera europea. Les imaxes van servir como material espositivu, pero tamién como documentu sobro’l trabayu agrariu, les formes de producción y la diversidá cultural de los territorios participantes. Estes cuestiones formen parte igualmente del debate públicu sobre la rede, como se plantegó nel SIDRAFORUM’26 de Nava, centráu na participación de los conceyos sidreros nos nuevos espacios europeos de cooperación.
