El SIDRAFORUM’26 va abordar en Nava la participación del conceyu dende l’entamu en Cider Cities y nel programa européu CIDEREU, con intervenciones de Marcos A. Fernández y Xuan de Con.
LA SIDRA.- El SIDRAFORUM’26 va cellebrase esti xueves 9 de xunetu, a les 20:00 hores, nel Muséu de la Sidre d’Asturies, dientro del programa del Festival de la Sidre de Nava. La sesión va llevar por títulu “Nava na Rede Europea de Ciudaes de la Sidre y la Mazana -Cider Cities-” y va centrase na participación del conceyu navetu, dende l’entamu, na Rede Europea de Ciudaes de la Sidre y la Mazana –Cider Cities- y nel proyeutu européu CIDEREU.
Esti enfoque ye especialmente importante porque Nava nun apaez agora como una incorporación puntual a una dinámica yá creada, sinón como ún de los territorios asturianos implicaos dende’l principiu nuna iniciativa europea que busca conectar ciudaes, conceyos y entidaes venceyaes históricamente a la cultura de la mazana y la sidre. El SIDRAFORUM va permitir esplicar qué significa esa participación, qué papel pue desempeñar Nava dientro de la rede y qué posibilidaes abre pa la cultura sidrera asturiana.
La sesión va contar cola intervención de Marcos A. Fernández, presidente de la Fundación Asturies XXI y miembru de la dirección de Cider Cities, de la que la propia Fundación Asturies XXI ye socia fundadora. La so participación va sirvir p’asitiar Cider Cities dientro del trabayu desenvueltu nos postreros años pa articular una cooperación europea ente territorios sidreros, con atención a la cultura, el padremuñu, el turismu, la economía rural y la tresmisión social de la sidre. Esa dimensión internacional yá tuvo presencia pública n’otros espacios, como cuando Cider Cities presentó la so rede europea nel I Foru Canariu de la Sidre.
Xunto a elli va intervenir Xuan de Con, entamaor del Sidraforum y representante de Nava nel proyeutu européu CIDEREU, subvencionáu pola Xunión Europea y llideráu pola Fundación Asturies XXI. La so presencia venceya l’actu cola trayeutoria del Sidraforum como espaciu de reflexón dientru del Festival de la Sidre de Nava y, al empar, cola participación direuta del conceyu nun proyeutu européu que naz precisamente pa reforzar la Rede de Ciudaes de la Sidre y la Mazana.
CIDEREU nun plantega la sidre como un elementu aislláu, sinón como parte d’una cultura compartida ente territorios europeos. La mazana, la pumarada, los llagares, les formes de consumu, les fiestes, los museos, la hostelería y la memoria social venceyada a la sidre formen parte d’un campu común de trabayu. Dende esa perspeutiva, la presencia de Nava dende l’entamu tien un valor añadíu: permite qu’ún de los conceyos de referencia de la sidre asturiano participe na definición d’esa cooperación dende les sos primeres fases.
La evolución de Cider Cities nos postreros meses confirma amás que la rede ta medrando como espaciu de collaboración ente territorios. La incorporación de Villaviciosa a Cider Cities amuesa l’interés d’otros conceyos asturianos por participar nesti marcu, mentanto que los primeros contautos pa incorporar A Estrada a Cider Cities indiquen la capacidá de la rede pa abrir diálogu con otros territorios peninsulares con tradición sidrera.
La escoyeta del Muséu de la Sidre d’Asturies como sede del alcuentru refuerza amás el sentíu del actu. Nava cuenta con una trayectoria singular dientro de la cultura sidrera asturiana, pol so festival, pol so texíu llagareru, pol so muséu y por una programación que dende hai décades contribúi a caltener la sidre como elementu central d’identidá colectiva. Esa centralidá cultural y gastronómica vese tamién en cites como los XXXVII Platos a la Sidre de Nava, que refuercen la rellación ente sidre, hostelería, territoriu y promoción local.
Con esta sesión, el Festival de la Sidre de Nava suma un espaciu d’analís sobro’l futuru del sector y sobro la necesidá de participar en redes estables de cooperación. Cider Cities y CIDEREU ufierten un marcu pa compartir esperiencies, reforzar venceyos institucionales, abrir nueves víes de promoción y asitiar la cultura sidrera asturiana en diálogu con otros territorios europeos. Nava, al participar dende l’entamu en dambos procesos, nun solo se suma a esa conversación: forma parte de la so construcción.
