“Evolución ya importancia de la producción de mazana de sidre n’Asturies”

Emilio Martínez dio la charra na tarde del 19 mayu nel Xardín Botánicu de Xixón

LA SIDRA.- L’inxeñeru Emilio Martínez foi quien dio la conferencia. Demientres unes dos hores, desplicó al públicu asistente d’au vien la sidre, los primeros pasos de la producción d’esta bébora n’Asturies, la implantación y desendolcu del so comerciu, l’estáu de la industria sidrera anguaño y los peligros a los que s’enfrenta.

Asina, Martínez fexo un repasu dende’l periodu neolíticu fasta la dómina contemporánea, faciendo fincapié en momentos importantes como: sieglu I A.C. cuando Estrabón noma la bébora que denoma Zythos; el 781, año de la Fundación del Monesterio de San Vicente (Uviéu) nel que se ceden varies pumaraes de la fastera; los primeros contratos de mampostería nel sieglu XI nel que’l dueñu d’un tarrén ufre tarrenos pa pumares; la introducción del maíz, fabes y pataques nel sieglu XVI y la so incidencia na producción. “Anteriormente la mazana utilizábase más como alimentu que pa facer sidre. Cola introducción de los productos americanos, más cantidá de mazana foi pa facer sidre” rellató.

L’especialista tamién desplicó les fases pa la ellaboración de sidre y como evolucionaren los medios de producción colos años fasta llegar a los llagares d’anguaño. Otru de los temes trataos fo’l de les races de mazana asturianes. “Les que son pa sidre d’escoyeta o DOP páguense meyor, por esta xida los collecheros tírense más por estes; eso ye una arma de duple filu porque ta perdiéndose heteroxeneidá” sopelexó Martínez. Haza la fin de la charra l’especialista faló sobro la polinización de les pumaraes, el fueu bacterianu y la importancia del “esclariáu” nel intre la floración pa nun favorecer la vecería. “Eso tuviera que facese cola collecha pasada, qu’hebio mazana abondo. A ver la que vien como tará. Habrá flor, pero’l problema sedrá cuando escomiencen a cuayar los frutos” dixo.