Entamu LA SIDRA 168

Entamu

Acábasemos un añu especialmente interesante no que cinca a la sidre, y failo poniendo de manifiestu un interesante abanicu de les nueves tribes de sidre, tanto no que cinca a calidá como en diversidá, too ello xunío a una ca vegada mayor demanda social.

Les nueves espresiones de la nuesa sidre tradicional, sobro too la sidre axampanao y la sidre brut, van ganando espaciu progresivamente nel nuesu país ya inclusu a nivel estatal, y fainlo non como consecuencia d’un anticatalanismu enfermizu, sinon como resultáu de la so ca vegada mayor calidá y tamién, por qué non reconocelo, porque la sociedá asturiano ye ca vuelta más cosciente de la necesidá de defender una economía identitario.

L’esfuerzu que fixeron, que fain díi ente díi, los llagareros ye pergrande, la diversificación de productu ye una necesidá evidente, pero la inversión n’investigación y difusión del productu ye enorme, por más qu’esistan iniciatives como’l nuesu Salón Internacional de les Sidres de Gala que s’esmolecen por aidar a la so conocencia y espardimientu. Los resultaos son bonos y les perspeutives meyores.

Llamentar, eso sí, tola mazana que se perdió por nun atopar sitiu nos llagares, la que se dexó pudrir en baxo y la que s’esportare –a precios ridículos- pa zusmios.

Ye un bon momentu ésti pa recapacitar, y acullá del reinal desenfotu ya incapacidá d’un “Principado” inoperante, hai d’escomenzar a plantegase la necesidá d’un Plan Estructural pal seutor sidreru, un seutor sofitáu en tres pegollos: pumareros, llagareros y chigres. ¡Nun mos escaezamos de los chigres! Un plan que dea rempuesta a un panorama cambiante nel qu’hai de destacar los cerca de 200.000 mozos asturianos que se vieren forciaos a emigrar nos postreros 20 años, l’avieyamientu de la nuesa población, l’aculturización que carecemos, y tamién el turismu que mos llega, la esportación, los nuevos avances científicos y téunicos aplicaos al seutor… Hai de planificar, saber a qué atenemos y facer valoraciones y proyeiciones oxetives.

Tamos nun bon momentu y nun hai de desaprofitar la ocasión pa siguir meyorando.