El fotógrafu Eduardo San Vicente álzase col Primer Premiu d’esti referencial concursu —que lleva asociada la Medaya d’Oru de la Confederación Española de Fotografía— pola so obra “Gotes que cunten hestories: escanciando tradición”.
El XVII Concursu Internacional de Semeyes LA SIDRA, entamáu pola Fundación Asturies XXI col patrociniu del llagar Sidra JR y cola collaboración téunica de la Asociación Asemeyando, fixo públicu’l fallu del so xuráu.
El númberu participantes caltúvose en cifres asemeyaes a les de la edición pasada, reafitando la consolidación d’esti certame como una de les principales referencies internacionales dedicaes a la cultura sidrera dende l’ámbitu artísticu y fotográficu.
El Primer Premiu, dotáu con 700 € en metálicu y la Medaya d’Oru de la Confederación Española de Fotografía (CEF), concedióse al fotógrafu rioxanu Eduardo San Vicente pola so obra “Gotes que cuenten hestories: escanciando tradición”, una imaxe que capta con gran fuercia espresiva’l momentu del escanciáu, símbolu por escelencia de la sidre asturiano.
El Segundu Premiu, con 200 € en metálicu y la Medaya Plata de la CEF, recayó en Juan Carlos Hernández Fernández pola so obra “Siempres ta con nós”, mentantu que’l Tercer Premiu, dotáu con 100 € en metálicu y la Medaya Bronce de la CEF, foi pa Francisco J. Domínguez García pola semeya “Sidre cardiosaludable”.
La Mención Especial “Sidra JR”, que inclúi 100 € en metálicu y dos caxes de Sidra JR, concedióse a Óscar Chamorro Flórez pola so obra “Llavaeru botelles”, una mirada nostálxica y sensible al trabayu artesanal nos llagares asturianos.
El xuráu del concursu tuvo presidíu pol fotógrafu asturianu Luis José Vigil-Escalera, “Lujó Semeyes”, Maestru de la Confederación Española de Fotografía (M CEF) y Excelencia FIAP (Federación Internacional del Arte Fotográfico), autor con una amplia trayeutoria espositiva y docente, y con numberoses distinciones en certámenes nacionales y internacionales.
La entrega premios y la naguración de la esposición coles obres gallardonaes y finalistes va cellebrase na Sidrería La Galana (Plaza Mayor de Xixón) el 14 de payares a les 20 hores. Dempués, la muestra formará parte de la esposición itinerante “Semeyes de LA SIDRA”, que percorrerá distintos espacios sociales y culturales a lo llargo del prósimu añu.
El concursu y les esposiciones venceyaes desendólquense gracies al sofitu del llagar Sidra JR y cunten cola subvención de la Conseyería de Cultura, Política Llingüística y Deporte del Principáu d’Asturies, que impulsa la promoción del padremuñu sidreru como una espresión viva de la identidá y la cultura asturiana.
