Entamu LA SIDRA Setiembre’23 (Nb. 233)

Entamu

Escepcionalmente intensu, esti mes de setiembre ta resultando no qu’a la sidre se refier; d’una intensidá estraordinaria, con  una sucesión d’eventos sidreros de calidá difícilmente superables, y con una bien significativa participación popular.

Y ye qu’a la siempres destacable Fiesta de la Sidre de Xixón siguiéronla les cellebraciones sidreres de Villaviciosa y los múltiples concursos de sidre casero que se rialicen per tol país, apuntando a un final portentosu col anunciáu XIII Salón Internacional de les Sidres de Gala –SISGA’23-. Por nun citar l’ensame de fiestes, romeríes y cellebraciones varies que nestos díis tienen a la sidre si non como protagonista, sí como acompañante obligada.

Ensin llugar a duldes un aspeutu fundamental va ser la cellebración del SISGA’23, que va tener llugar del 28 de setiembre al 1 d’ochobre, y que non solo va poner a Xixón y Asturies como referencia sidrera internacional, sinón que nel trescursu del mesmu procederáse a la costitución de la Rede Europea de Ciudaes de la Sidre –RECS- n’actu solemne que se va clelebrar nel Salón de Recepciones del propiu Conceyu de Xixón, y nel que van participar representantes de conceyu y rexonales d’estremaos Estaos europeos.

Too son bones noticies, espresión de cómo avanza’l mundiu la sidre y de cómo se materializa’l necesariu procesu de internacionalización, dende una perspeutiva de llideralgu a la qu’Asturies tien d’optar de forma abierta y cosciente, y que se refuerza de forma vultable col  aniciu d’esta RECS, que tendrá la so see principal en Xixón.

N’otru orde de coses el mundiu de la sidre asturiano viose ensombrecíu pol incendiu sufríu nel llagar Viuda de Angelón que provocó importantes daños materiales, y que sirvió pa que non solo’l sector sidreru, sinón el conxuntu de la sociedá asturiana amosara’l so sofitu y solidaridá col mesmu, siguiéndose atentamente la so recuperación y deseyándo-y, como ye llóxico, la mayor de les fortunes.

D’otra miente, les postreres augües de setiembre ameyoraron les perspeutives d’unes pumaraes bien cargaes, que taben empecipiando a resentise de resultes de la seca, y qu’agora paecen alicar.

Too paez indicar qu’ésti va ser un bon añu de collecha.