A Estrada podría incorporase a Cider Cities como representante de la cultura sidrera en Galicia
La XIII Feira da Sidra d’A Estrada valió de marcu esti fin de selmana pa entamar los primeros contactos ente’l Conceyu d’A Estrada y los responsables del proyectu internacional Cider Cities, una iniciativa que busca poner en valor les principales ciudaes y territorios sidreros d’Europa y otros países con fonda tradición venceyada a la mazana y la sidra.
L’alcuentru tuvo llugar coincidiendo cola celebración de la cita añal sidrera gallega y cuntó cola presencia del alcalde d’A Estrada, Gonzalo Louzao, de los organizadores del eventu, de los promotores del proyectu y de la conselleira do Medio Rural de la Xunta de Galicia, María José Gómez. Mientres la xornada abordóse la posibilidá de qu’A Estrada se convierta na representante gallega dientro de la rede Cider Cities, una propuesta que foi acoyida con interés poles distintes partes.
Tres esti primer contactu, quedó prevista una nueva reunión de trabayu nes próximes selmanes col oxetivu de concretar los términos de la incorporación y les posibles llinies de collaboración ente’l conceyu pontevedrés y esti proyectu internacional.
La candidatura d’A Estrada sofítase nel papel protagonista que la villa vien desempeñando na promoción de la cultura sidrera en Galicia. El conceyu acueye dende hai años la Feira da Sidra, considerada la principal celebración dedicada a esta bebida en Galicia.
La importancia d’A Estrada nel sector nun puede entendese ensin el pesu que la producción de mazana sidrera tien en Galicia. La comunidá autónoma ye la mayor productora de mazana destinada a la ellaboración de sidra de tol Estáu.
Nos últimos años, la Feira da Sidra consolidóse como un escaparate del xorrecimientu del interés gallegu pola sidre, reuniendo productores de delles procedencies, consumidores y profesionales venceyaos a la cultura de la sidra. La edición d’esti añu volvió amosar esa puxanza, con una importante afluencia de públicu.
La posible incorporación d’A Estrada a Cider Cities supondría un importante pasu alantre na proyección internacional de la sidra en Galicia, facilitando la creación de venceyos con otros territorios sidreros y favoreciendo l’intercambiu d’esperiencies alredor del patrimoniu cultural, el turismu y el desendolcu económicu venceyáu a la sidra.
La próxima reunión ente les partes permitirá concretar una propuesta que podría convertir a A Estrada na voz de Galicia dientro d’una rede internacional llamada a reforzar la visibilidá de les distintes cultures sidreres nel mundu.
