Abrióse’l plazu pa que los chigres puedan solicitar l’autorización d’usu de la marca de garantía “Sidreríes d’Asturies, Calidá Natural”, un distintivu oficial que reconoce la calidá y el compromisu col productu sidreru asturianu.
El plazu de presentación de solicitúes ta abiertu dende’l 1 de marzu fasta’l 31 de mayu de 2026 (23:59 hores).
¿Quién pue solicitala?
Podrán optar a esta marca les persones físiques o xurídiques titulares de Chigres-Restoranes y Chigres-Bar que tean inscrites nel Rexistru d’Empreses y Actividaes Turístiques del Principáu d’Asturies.
La marca “Sidreríes d’Asturias, Calidá Natural” foi creada como distintivu oficial pa enfortiar la imaxe de los chigres que cumplen unos estándares específicos venceyaos a la tradición, la profesionalidá y la promoción de la sidre asturiana.
Requisitos y documentación
Les empreses solicitantes deberán presentar:
-
- Solicitú en modelu normalizáu.
- Declaración responsable de cumplimientu de requisitos.
- Acreitación de cuatro años d’antigüedá o esperiencia nel sector de la hostelería asturiana, nel casu de nun cumplir el requisitu temporal como titular del establecimientu.
Amás, deberá acreditase tar al corriente de les obligaciones tributaries y cola Seguridá Social, nel casu de oponese a la consulta automática per parte de l’Alministración.
Tramitación
La solicitú pue presentase:
-
- De manera presencial nes oficines d’atención ciudadana y rexistros habilitaos.
- De manera telemática al traviés del Rexistru Lletrónicudel Principáu d’Asturies o del Rexistru Lletrónicu Xeneral del Estáu.
El muérganu xestor ye’l Serviciu d’Ordenación, Innovación y Calidá, y el plazu máximu de resolución ye de tres meses, con silenciu alministrativu desestimatoriu.
Un distintivu estratéxicu pal sector
La marca “Sidreríes d’Asturies, Calidá Natural”, regulada pol Decreto 2/2015 y el so Reglamentu d’usu espublizáu en 2016, forma parte de la estratexa institucional pa enfortiar la imaxe de la sidre y de los chigres como espacios identitarios de la cultura asturiana.
Dende’l sector valórase esti distintivu como una ferramienta que contribúi a reforzar la confianza del consumidor y a consolidar el chigre tradicional como parte esencial del ecosistema sidreru d’Asturies.
Les bases completes y la documentación oficial puen consultase na sede electrónica del Principáu d’Asturies.
