Campoastur reinauguró esti 3 de xunu’l Llagar Casería San Juan del Obispo, allugáu en San Juan del Obispo, na parroquia de Tiñana (Siero), coincidiendo cola cellebración del Díi Mundial de la Sidre. L’actu cuntó cola presencia del presidente del Principáu d’Asturies, Adrián Barbón, amás de representantes institucionales, del sector agroalimentariu y de la cultura sidrera asturiana.
LA SIDRA.- Cola puesta en marcha d’esti equipamientu, Campoastur abre una nueva etapa pa un llagar que permaneciera ensin actividá y reforcia’l so apueste pola producción sidrera, el sector agroalimentariu y el mediu rural. La cooperativa asume la xestión del proyeutu col envís de reactivar la instalación y dar continuidá a una infraestructura venceyada históricamente a la ellaboración de sidre.
Nel actu d’inauguración, el presidente de Campoastur, Carlos García, destacó’l simbolismu de cellebrar la reapertura coincidiendo col Día Mundial de la Sidre y punxo en valor la importancia de la cultura sidrera asturiana, reconocida pola UNESCO como Padremuñu Cultural Inmaterial de la Humanidá. Tamién recordó la necesidá de siguir trabayando pola conservación y promoción d’esti padremuñu.
Pela so parte, el direutor xeneral de Campoastur, Jesús López, enmarcó la recuperación del llagar dientro de la estratexa de la cooperativa pa xenerar actividá económica, impulsar el mediu rural y fortalecer proyectos venceyaos al territoriu.
Na clausura del actu, Adrián Barbón destacó la importancia del Díi Mundial de la Sidre y señaló que la iniciativa amplía la vinculación de Campoastur col cultivu de mazana y la producción sidrera en Tiñana, a la que definió como “la milla de la sidre”. El presidente señaló amás que’l proyeutu contribúi a la creación d’emplegu nel mediu rural y al fortalecimientu de la industria agroalimentaria asturiana.
El Llagar Casería San Juan del Obispo dispón d’un entornu de 6,5 hectáries de pumarada, con mazana acoyío na DOP Sidre d’Asturies y variedaes tradicionales. Les instalaciones cunten con 18 depósitos de 24.500 llitros de capacidá caún y dos prenses hidráuliques tradicionales pa mayar.
Ún de los elementos más singulares del equipamientu ye la so arquiteutura. L’edificiu foi diseñáu con criterios de sostenibilidá, utilizando contenedores rellenos de piedra caliar que favorecen la ventilación y la regulación térmica. Amás, incorpora un sistema automatizáu de riegu que contribúi a la refrigeración natural de les instalaciones.
Tres les intervenciones institucionales, los asistentes participaron nuna visita guiada poles instalaciones y nuna degustación de sidre procedente d’ún de los depósitos del llagar. La xornada remató con un aperitivu ellaboráu con productos asturianos de la cooperativa y amenizáu pol grupu folk Entós.
Según destacó Campoastur, esti proyeutu suma un nuevu pasu na so estratexa de fortalecimientu de la producción de mazana y sidre n’Asturies, xunto con otres iniciatives venceyaes a les pomaraes de Somao y L’Enguilu, orientaes a reforzar la rellación ente agricultura, cultura sidrera y desendolcu rural.
