La Casa de la Buelga acoyó la clausura del II Cursu de Sumiller de Sidre, una formación que busca crear profesionales capaces d’analizar, valorar, servir y comunicar la sidre con criterios especializaos
La Casa de la Buelga acoyó la clausura del II Cursu de Sumiller de Sidre, una formación que busca crear profesionales capaces d’analizar, valorar, servir y comunicar la sidre con criterios especializaosLA SIDRA.– La entrega de diplomes del II Cursu de Sumiller de Sidre – Panel de Tastia, celebrada na Casa de la Buelga de Ciañu, sirvió non solo pa reconocer l’esfuerzu del alumnáu, sinón tamién pa reclamar avances reales na profesionalización del sector sidreru.
El presidente de la Fundación Asturies XXI y director de la Escuela de Sumillería de la Sidra, Marcos Abel Fernández, destacó na so intervención la distancia qu’esiste ente la reconocencia internacional de la cultura sidrera asturiana y les midíes concretes adoptaes hasta agora.
“Tamos presumiéndolo muncho, pero hai poques coses concretes. Agora mesmo los echadores de sidre nun tienen la reconocencia que tienen que tener y les sidreríes tampoco tienen la reconocencia que tienen que tener. Cualquiera se puede poner el nome de sidrería y depués se sirve la sidre de cualquier manera”.
Fernández recordó que, magar la declaración de la cultura asturiana de la sidre como Padremuñu Cultural Inmaterial de la Humanidá, siguen ensin existir estudios reglaos d’enoloxía nin de sumillería de la sidre n’Asturies.
“Nun esisten estudios d’enoloxía de la sidre tovía n’Asturies, nun hai estudios reglaos de sumillería de la sidre n’Asturies, tenemos un déficit d’ochenta millones de kilos de mazana n’Asturies pa producir solo pa nós y nun se ta faciendo nada, o nun ta faciéndose abondo”.
El responsable de la Fundación Asturies XXI destacó, frente a esta falta de respuesta institucional, el papel desempeñáu pola ciudadanía y poles entidaes que trabayen dende hai años na defensa y tresmisión de la cultura sidrera.
“El protagonismu principalmente ta teniéndolu la sociedá civil. La sociedá asturiana ye la que ta tirando p’arriba de la cultura asturiana de la sidre”.
Nesti sen, punxo especialmente en valor el llabor de los llagares caseros y de les asociaciones que caltienen viva una parte fundamental de la cultura sidrera, favoreciendo la tresmisión de conocimientos, práctiques y formes d’ellaboración.
Pela so parte, Lluis Benito, presidente de la Cátedra de la Sidra d’Asturies, venceyó la formación del sumiller cola figura tradicional del ‘entendíu en sidre’. Destacó que’l conocimientu especializáu sobre la bebida nun nació colos cursos actuales, sinón que tien una base popular y tradicional muncho anterior a la formación reglada.
La nueva figura del sumiller de sidre permite sistematizar, completar y actualizar esi saber tresmitíu durante xeneraciones, incorporando ferramientes d’análisis sensorial, conocimientos técnicos sobre la ellaboración y criterios profesionales pa la valoración, el serviciu y la comunicación del productu.
Nel actu tuvieron presentes autoridaes llocales, representantes de la Fundación Asturies XXI, la Cátedra de la Sidra d’Asturies, el CIFP de Hostelería y Turismu de Xixón y la DOP Sidra d’Asturies, amás del profesoráu, l’alumnáu y persones venceyaes al sector.
A lo llargo de les intervenciones institucionales destacóse la implicación del alumnáu y del profesoráu, asina como la importancia de la collaboración ente entidaes culturales, educatives, productores y alministratives.
El filu común foi la necesidá de dotar al mundu sidreru de profesionales con conocimientos técnicos, pero tamién con capacidá pa interpretar y tresmitir el valor cultural del productu.
La presencia de representantes de la DOP Sidra d’Asturies reforzó la relación ente formación, calidá, orixe y correcta presentación del productu. Una sidre de calidá precisa profesionales capaces de conservala, sirvila y presentala adecuadamente, evitando que’l trabayu realizáu nel pumar y nel llagar pierda valor nel últimu pasu anantes de llegar a quien la consume.
El cursu tuvo una duración total de 25 hores y desendolcóse nel CIFP de Hostelería y Turismu de Xixón al traviés d’un conveniu de collaboración cola Escuela de Sumillería de la Sidra de la Fundación Asturies XXI.
