L’alumnáu que superó’l II Cursu de Sumiller de Sidre – Panel de Tastia va recibir los sos diplomes esti xueves 23 de xunetu, a les 18:30 hores, na Casa de la Buelga de Ciañu. La formación, de 25 hores, centróse nel análisis sensorial y na evaluación téunica de la sid
re.
LA SIDRA.– La Casa de la Buelga, asitiada na cai La Buelga, 8, de Ciañu, va acoyer esti xueves 23 de xunetu l’actu d’entrega de diplomes del II Cursu de Sumillería de Sidre. La ceremonia va entamar a les 18:30 hores y va reconocer el trabayu del alumnáu que completó la formación y algamó la calificación d’APTU.
L’envite ta promovíu pol Ayuntamientu Llangréu, la Fundación Asturies XXI y la Cátedra de la Sidra d’Asturies. Nel actu va participar l’alcalde llangreanu, xunto con representantes de les entidaes entamaores, el profesoráu y l’alumnáu. La ceremonia va poner el pieslle institucional a una edición centrada nel Panel de Tastia, concebíu como una ferramienta pa formar profesionales capaces d’analizar la sidre con criterios téunicos compartíos.
La Escuela de Sumillería de la Sidre nació en 2025 cola organización del primer Cursu de Sumiller de Sidre, una formación básica de 20 hores que combinó conteníos sobro ellaboración, cultura sidrera, tastia, serviciu y evaluación sensorial. Los diplomes d’aquella primer promoción de sumilleres de sidre entregáronse nel marcu de la XV Primer Sidre l’Añu.
La segunda edición del cursu dio continuidá a esi trabayu con un nivel más avanzáu y una convocatoria de 20 places. La formación desenvolvióse nel CIFP de Hostelería y Turismu de Xixón, en collaboración cola Fundación Asturies XXI, y tuvo una duración total de 25 hores.
El Panel de Tastia como exa del cursu
El principal elementu diferenciador d’esta edición foi’l Panel de Tastia de Sidre, dirixíu por Juan Luis García, profesor del CIFP de Hostelería y Turismu de Xixón y diructor del cursu. El panel dsendolcóse de manera continuada a lo llargo’l programa, con tasties a ciegues, muestres codificaes y fiches normalizaes d’evaluación.
El métodu permitió al alumnáu trabayar na identificación d’arumes, sabores y sensaciones visuales y olfatives, amás de na detección de defeutos venceyaos a la ellaboración, la conservación o’l serviciu. Cada exerciciu incluyó una valoración individual y una puesta en común posterior destinada a comparar percepciones y establecer criterios téunicos.
El programa del II Cursu de Sumillería incluyó tamién conteníos sobro cultura sidrera asturiana, sumillería aplicada a la sidre, sidre de xelu, neuroreceptores, terminoloxía enolóxica, lleldos y procesos de formientación, families aromátiques, maridaxe, serviciu y echáu de sidre.
L’oxetivu de la formación ye capacitar a les persones participantes pa encamentar y sirvir correctamente distintes tipoloxíes de sidre, pero tamién pa intervenir en xuraos, concursos y tasties oficiales o realizar llabores d’asesoramientu especializáu. D’esta miente, la Escuela busca establecer una base técnica común que permita describir, valorar y comunicar les característiques de cada productu.
La formación reglada complétase con actividaes más concretes, como’l Taller de Sumillería de Sidre, nel que se trabayó la identificación de los saborgos básicos, l’acidez, l’amargor, el secante, l’acéticu y los posibles defeutos de la sidre natural.
Los diplomes que van entregase en Ciañu acrediten la superación del II Cursu de Sumiller de Sidre – Panel de Tastia. El documentu lleva les firmes de Juan Luis García, como direutor del cursu, y de Marcos A. Fernández, presidente de la Fundación Asturies XXI, y recueye’l sofitu de la Conseyería de Cultura del Principáu y del CIFP de Hostelería y Turismu de Xixón.
La ceremonia va reconocer l’esfuerzu y l’enfotu del alumnáu, al tiempu que va marcar el final d’una formación dedicada a consolidar conocencies práctiques y criterios profesionales alredor de la tastia, la recomendación y el serviciu de la sidre.
