¿Hai que ximielgar la botella sidre?

Ca vegada ye más frecuente ximielgar la botella sidre enantes descorchala ¿ye normal?

LA SIDRA.- Al ximielgar la botella, lo que facemos ye bater la sidre y mecéla cola borra que ta nel fondón de la botella. Ello asina, esti vezu namás ye afayaízu pa la sidre que lleve poco tiempu corchao o mui quimicao, ello ye, que tea poca madre, en cuyu casu ye posible qu’al batela s’intensifique’l so saborgu.

Por embargu, nel casu de sidre posao, que lleva un tiempu corchao, el llíquidu ta claru y tresparente y les borres depositaes nel fondón son munches, llegando a ser auténticos trapos, en cuyu casu lo qu’hai que faer ye precisamente a la escontra, procurar nun ximielgar la botella pa que la madre nun se meza cola sidre, y nun forme gurullos nin-y aporte’l saborgu poco afayaízu que-y ye propiu.

Anguañu, la sidre que se viende nos chigres ye polo xeneral sidre acabante de corchar, colo qu’al ximielgar la botella ye posible que s’intensifique’l so saborgu. Por embargu, fasta hai bien poco, la sidre más apreciao yera la sidre aneyo, ello ye, la que lleva corchao más d’un añu, en cuyu casu suel tener muncha madre, auténticos trapos, y por ello percuriábase nun ximielgar la botella, y dexábase ensin tomar el fondón de la mesma onde quedaba tola madre. D’aende vien el vezu de nun tomar el fondón de la botella, y dexar siempres un restu, porque yera onde quedaba la madre… curiosamente esti vezu –el dexar el fondón- sigue calteniéndose inclusu cuandu la sidre ta acabante corchar y al ximielgar la botella yá nun queda madre nel fondu la botella.