Grupo Codilex y la revista LA SIDRA entamaron na Sidrería El Mallu d’Avilés un alcuentru con sidre Menéndez, vinos de Carlos Serres, ibéricos Miguel España y tartes de quesu La Queserina, combinando la tastia guiada cola presentación de formatos que faciliten el serviciu nos establecimientos hosteleros
La sidre tuvo un papel protagonista en «12 meses, 12 sabores», abriendo l’alcuentru gastronómicu entamáu por Grupo Codilex y la revista LA SIDRA. La propuesta axuntó productos de calidá y profesionales pa conocer de cerca les sos elaboraciones, descubrir combinaciones y presentar soluciones práctiques pal trabayu diariu na hostelería.
La xornada contó cola intervención del presidente de Codilex y cola participación de Llucía Fernández, de la revista LA SIDRA, qu’ufrió un taller aceleráu de tastia de sidre, presentando la que diba acompañar los productos: Menéndez y la so Valdornón, acoyida a la Denominación d’Orixe Protexida Sidra d’Asturies.
Esti acercamientu a la tastia permitió dar protagonismu a la sidre como parte de la esperiencia gastronómica, poniendo l’atención nel productu y nel so papel na mesa. A continuación Natalia Rozados, comercial pal norte l’estáu de la marca d’ibéricos Miguel España, destacó tanto la calidá de los productos como les ventayes de los sos formatos pal sector hosteleru. En particular, presentó’l xamón precortáu a man como una opción que permite ufiertar esti tipu de corte ensin tener que realizalu nel momentu del serviciu, amenorgando les esperes y facilitando la preparación de les raciones. La ocasión permitió comprebar en primer persona la calidá de los productos presentaos.
El percorríu siguió colos vinos de la bodega rioxana Carlos Serres, presentaos pol so enólogu, Roberto de Carlos Rodríguez, quien fexo un completu percorríu pela bodega que representa, deteniéndose en detalles sobre los toneles qu’usen, les variedaes d’uva y los distintos tiempos d’avieyamientu d’unos vinos y otros, ufriendo a los asistentes un reserva, un gran reserva y un esplumosu, acompañaos pola selección de xamón y embutíos ibéricos de Miguel España.
El final dolce llegó coles tartes de quesu de La Queserina, na so versión tradicional y en distintes variedaes de sorprendentes saborgos, llamando especialmente l’atención la de pistachu. La presentación destacó la utilización de productos de primera calidá na ellaboración de les tartes ya incidió tamién na utilidá de los formatos yá porcionaos y llistos pa servir, que simplifiquen la preparación del postre y faciliten la so incorporación a la ufierta de bares y restaurantes.
Tanto na presentación de los ibéricos como na de les tartes de quesu, la calidá acompañóse d’una cuestión mui concreta: cómo ufiertar un bon productu con una preparación más áxil. El xamón cortáu a man envasau y les tartes porcionaes exemplificaron esi valor añadíu pa los negocios, especialmente nos momentos de mayor carga de trabayu.
«12 meses, 12 sabores» xunió asina na so primer edición divulgación sidrera, tastia y presentación gastronómica, con atención al sabor y a les necesidaes de quienes tienen que llevar esos productos a la mesa cada día.
