La sidre ellaborada en Sariegu estrénase como ingrediente principal de «Valverán Bajo Cero», un cóctel presentáu en Madrid nuna collaboración con Casa Gerardo. La marca suma una nueva reconocencia nel SISGA, onde consiguió una merecida medaya de Plata en 2026.
LA SIDRA.- La sidre de xelu asturiana abre nueves posibilidaes na coctelería d’autor. Valverán 20 Manzanas, ellaborada por Llagares Valverán, perteneciente a Masaveu Bodegas, protagoniza una propuesta na que pasa de ser una bébora pa degustar por sigo mesma a convertise n’ingrediente d’un cóctel.
La presentación celebróse los díes 20 y 21 d’ochobre nel NH Collection Madrid Eurobuilding, dientro d’una collaboración con Casa Gerardo al traviés de Casa de Comidas. El menú, diseñáu por Rafa Zafra y Marcos Morán, percorrió sabores asturianos con bocadiellu de quesos, croquetes de compangu, crema de nécoras y fabada de Prendes, ente otres ellaboraciones. Como cierre, los asistentes tastaron «Valverán Bajo Cero» acompañáu d’una crema d’arroz con lleche.
Valverán Bajo Cero: sidre de xelu, calvados y bourbon
El cóctel, creáu pa esta ocasión, combina Valverán 20 Manzanas con calvados VSOP, bourbon y orange bitters. La receta pon en xuegu’l calter concentráu de la sidre de xelu y les sos posibilidaes gastronómiques al llau d’otros destilaos.
La marca quier ampliar esta llinia de propuestes a eventos gastronómicos, hoteles, restoranes, terraces y cocteleríes especializaes. La iniciativa coincide cola reciente incorporación de la sidre de xelu a la DOP Sidre d’Asturies, un cambéu normativu que nun significa que toles botelles de sidre de xelu tean yá certificaes.
Una sidre triunfadora nel SISGA, con una merecida Plata en 2026
Valverán 20 Manzanas vien cosechando reconocencies en distintes ediciones del Salón Internacional de les Sidres de Gala. Consiguió’l Premium de sidre de xelu nel SISGA 2021 y una medaya d’Oru nel SISGA 2024. Tamién recibió un Premium nel SISGA 2025.
Esti añu, nel XVI SISGA celebráu en Xixón, Valverán 20 Manzanas recibió una merecida medaya de Plata na categoría de sidre de xelu, una distinción que s’añade a un historial de participación destacáu. La so trayectoria internacional inclúi igualmente’l reconocimientu nos World Cider Awards 2022.
Venti mazanes pa una botella
L’actual propuesta de Valverán nació en 2007. El nome 20 Manzanas refierse a les venti mazanes que se precisen, como mínimu, pa producir cada botella de 37,5 centillitros. La ellaboración inclúi la concentración del zusmiu pol fríu, a venti graos baxo cero, una fermentación d’aproximao diez meses y doce meses más de crianza sobre líes fines.
Dende la collecha hasta la botella trescurren cerca de dos años. La finca El Rebollar, en Sariegu, tien 40 hectárees y más de 20.000 pumares d’once variedaes autóctones. Tradicionalmente recomendada pa acompañar quesos, foie y postres de dulzor moderáu, la sidre de xelu Valverán demuestra agora que tamién pue ocupar un llugar nel mundu de los cócteles.
Masaveu Bodegas (imáxenes facilitaes).
