Trece establecimientos participen nes XXXVII Xornaes Gastronómiques de los Platos a la Sidre, que se cellebren esta fin de selmana en Nava con propuestes tradicionales ya innovadores venceyaes a la sidre.
Les XXXVII Xornaes Gastronómiques de los Platos a la Sidre yá tán en marcha en Nava. La presentación oficial cellebróse nel Muséu de la Sidre d’Asturies, onde representantes de la hostelería, la Confradería de la Sidre y les instituciones destacaron la importancia d’una cita gastronómica que sigue siendo una de les más veteranes y consolidaes d’Asturies.
“La felicidá tamién se cocina a la sidre”, destacóse durante l’actu. La escritora y periodista Ana Paz Paredes, madrina del eventu, punxo en valor la unión ente sidre, cocina asturiana y productu local, asegurando que “son el nuesu castiellu o’l nuesu castru”.
El programa oficial recueye trece establecimientos participantes nesta edición, una cifra que confirma la recuperación del certame tres dellos años con menor participación. Participen Casa Mino, Casa Dominganes, Sidrería Estrada, El Corralín de Campanal, Restaurante El Empalme, Bar Penamayor, Sidrería Prida, Poi Pizza, Bar Plaza, La Naveta, Café Mayfer, Cervecería Champion y Bunker Bar.
Demientres trés díes, Nava torna convertise en puntu d’alcuentru pa quien quiera esfrutar de platos ellaboraos con sidre, dende recetes tradicionales fasta propuestes más actuales. La ufierta inclúi carne, pexe, mariscu y postres nos que la sidre apaez como ingrediente fundamental de la cocina naveta.
Ente les ellaboraciones que podrán degustase estos díes figuren merluza, bacalláu, bonitu, pixín, cabritu, chorizos y chipirones a la sidre, xunto a propuestes más innovadores como sollombu de gochu albardáu con salsa de sidre, cabritu guisáu con aguardiente de sidre, pizza Ibérica 2.0 con chorizos a la sidre, tortilla con quesu Ovín y cecina a la sidre, tarta de sidre o picatoste con xeláu de sidre.
Les xornaes tán entamaes por Hostelnava y la Confradería de la Sidre. Mientres la presentación, Ana Paz Paredes destacó l’esfuerciu del sector hostelero pa caltener viva la cita gastronómica mientres cuasique cuatro décades. “Caltuviéronse a les dures y a les madures”, señaló, agradeciendo la unión y la implicación de los participantes.
L’alcalde Nava, Juan Cañal, valoró especialmente la recuperación de participación algamada esti añu, señalando que la presencia de trece establecimientos “fala d’una importante recuperación”. Na mesma llinia, el vicepresidente d’OTEA, Luis Alberto Martínez, reivindicó’l papel de la hostelería como motor económicu y social de la villa.
El programa inclúi tamién un pasacais el domingu a les 13.00 hores, amenizáu por Los Gascones, poniendo’l toque musical a una cita que sigue afitándose como una de les grandes cites gastronómiques de la Contorna de la Sidre.
