Entamu LA SIDRA d’Abril’21 (Nb. 204)

Entamu

Avanza la primavera, y ca vegada tenemos más ganes de que too vaiga normalizando. Esa ye la situación xeneral de la sociedá, y por supuestu, del seutor de la sidre.

Dempués de munchos meses de resistencia, d’afayamientu, d’atotar lo poco y lo muncho y de xenerar illusión y enfotu per onde se puede, toos albidramos qu’adulces les coses van dir ameyorando y tenemos la esperanza de qu’esti prósimu branu la situación normalice de dalguna miente.

Mentantu siguimos reiventándomos, y la Primer Sidre L’Añu –PSLA- ye una bona prueba d’ello. La cultura asturiana de la sidre afaese a lo que seya preciso y sigue espresándose fasta nes piores condiciones. Sidre Huerces quedó como la Meyor Primer Sidre L’Añu; la participación en toles actividaes d’esta PSLA foi tolo importante que podía ser; el Sidracrucis impúnxose y trunfó percima de les dures normatives sanitaries; y pudimos comprobar cómo en plenu andanciu mayóse sidre pa en casa, formientándola na forma tradicional en pipes de maera, y pudimos esfrutala nel concursu realizáu.

Per otra parte tenemos que destacar que per primer vegada tratóse nel “Principado” del seutor de la sidre d’una forma seria y con alternatives concretes. La moción presentada por Adrián Pumares parte d’una visión integral del seutor de la sidre qu’inclúi tamién a les sidreríes y cómo non, a los pumareros. Denuncia’l desdexamientu que fasta la fecha vinieron sufriendo per parte del “Principado” a diferencia de lo qu’asocede n’otres comunidaes autónomes, y recueye propuestes pa faer frente a custiones como l’acumulación de sidre vieyo nos tinos de los llagares énte la nueva collecha d’esti añu, o la situación de los piqueños pumareros, plantegando la cuestión fundamental nel equí y l’agora del seutor de la sidre y la mazana: la necesidá, la urxencia, d’un Plan Estratéxicu específicu.

D’otra miente, allégrensemos los güeyos ca vegada que miramos pa les pumaraes, cuando vemos los pumares cuayaos en flor; y cuando llega al nuesu paladar la primer sidre d’esti añu, yá escomenzamos a camentar no que mos depararán los frutos en ciernes pa la sidre del prósimu. Porque la vida sigue, la natura avanza.