Non más etiquetes

Jesús Casas, direutor xeneral de Desendolcu Rural y Agroalimentación, refuga crear otra etiqueta pa la sidre d’Asturies.

LA SIDRA.- La reclamación de los pequeños productores de mazana al “Principado” d’utilizar un etiquetáu específicu pa la sidre ensin regular pola DOP na que tamién se recueya l’orixe de la mazana emplegada foi refugada.

En pallabres de Jesús Casas, ye abonda col etiquetáu qu’estrema la sidre con Denominación d’Orixe pa que’l consumidor sepa con qué mazanes s’ellabora dicha sidre. La DOP cunta con 31 llagares y 322 collecheros adscritos, suponiendo un 5% del mercáu total de la sidre n’Asturies, y ye ellaborada con 22 races de mazana, que van aumentar fasta 76 la prósima temporada.

Pal direutor xeneral de Agroalimentación una nueva etiqueta xeneraría tracamundiu nel consumidor, yá que ésti pué estremar la sidre ellaborada con mazanes autóctones d’Asturies y sabe que tien de pagar más por ella.

Considera que ye cuestión del llagareru decidir con qué mazana quier ellaborar la so sidre, yá que ye un mercáu llibre, y procurar afaese a la demanda d’un productu controlláu y de calidá como la sidre DOP.

Per otru llau, achaca’l problema actual del escedente de mazana a una mala planificación per parte de el collecheros, que tendríen de conocer de man los niveles de produición de les pumaraes y la demanda de los llagares.

Nesti sen, Jose Luis Rubiera, expresidente de l’Agrupación Asturiana de Collecheros de Mazana de Sidre, considera que tendría d’esistir ciertu control sobro la sidre que nun pertenez a la DOP, yá que nun ufierta garantíes, al nun especificase na so etiqueta la so procedencia, daqué que’l consumidor tien de saber.