DOP y Sidra Selección comparten pódium en Villaviciosa

Sidra Val d’Ornón, del llagar Menéndez (Xixón), Sidra Foncueva (Sariegu) y Sidra Camín, de Trabanco (Xixón) fueron los trés trunfadores na 53 edición del certame maliayu qu’escueye la meyor sidre d’Asturies
D’alcuerdu al xuráu, compuestu por Joaquín Fernández, Gumersindo Martínez, Juan Pérez Miyar, Mariano Villoria y Victor Fernández, toos ellos espertos con peramplia esperiencia evaluando sidre, la meyor de les 38 presentaes al concursu de Villaviciosa, procedentes de llagares de toa Asturies, foi Sidra Val d’Ornón, de Menéndez -Xixón-; Segunda quedó la Sidra Foncueva Selección, de Sariegu, y tercera foi Sidra Camín, del llagar de Trabanco, tamién de Xixón.
La esbilla entamare díes antes y a esta final –na qu’hubo triple empate pal cuartu puestu- llegaron namá los siete meyores llagares. Pa llegar hasta equí estes sidres pasaron primero per un analís químicu d’amueses de les sidres presentaes, p’asegurase de que “cumplíen los criterios mínimos pa pasar a la final según lo que marca la llexislación vixente en calidá pa la sidra natural”. Pasaron tamién por una primer fase d’escoyeta na que se determinó qué sidres pasaríen a la gran final, que tuvo llugar la tarde d’ayeri na Plaza’l Güevu, con presencia de nutríu públicu, numberoses autoridaes y munchos de los llagareros participantes nel concursu.
El Concursu de Sidra Natural de Villaviciosa ye’l más antiguu d’Asturies. Celebróse por primer vegada en 1971, cuando la Hermandá de Caballeros Defensores de la Mazana y la Sidra, en collaboración col Conceyu, convocó la primer edición del mesmu dientro del Festival de la Mazana; entós yera biañal, pero’l so ésitu llevó a que se decidiera facelu tolos años. Agora ye unu de los más prestixosos y pa los llagareros trai un honor bien especial consiguir esta reconocencia, como dicía ayeri Sabino Menéndez en recoyendo el troféu con forma de mazana que representa la so victoria.
Amás, nel certame fixose un emotivu homenaxe al maliayés Laudelino Riva, un de los grandes collaboradores de los concursos sidreros de la Villa y d’otros conceyos asturianos, fináu va unos meses. Los sos hermanos -Carmen, Luis y Alejandro Riva- recoyeron una placa que trataba d’amosar la reconocencia del mundu sidreru a Laudelino.

Galería de Semeyes