Entamu

Va ser dificil atopar -y repitir- un mes tan volcáu cola sidre como esti mes d’agostu, y ye qu’a l’avezada actividá d’esti mes festivu, yá de por sigo especialmente importante, amiéstase una edición de la FIDMA na que la cultura asturiana de la sidre foi la principal protagonista, con enforma d’actividaes sidreres y estands dedicaos parcial o dafechu a ella.

Nesti sen hai de destacar el compromisu de la Fundación Caxa Rural de Xixón, los estands y les actividaes de Unicaja y Sabadell, l’estand del Conceyu Xixón, con ‘La ciudad que empezó a escanciar la sidra’, y sobromanera y bien especialmente, l’estand del ‘Principado’, con una esposición escelente, onde al rigor históricu amestóse-y un componente interactivu y participativu que, xunta cola variedá d’actividaes entamaes, fixo d’elli protagonista principal de la cultura asturiana de la sidre. ‘Asturies ye Sidrera. Lo nuestro ye mundial’ trunfó.

Les coses escomiencen a tar un pocu peor cuando se trata d’atopar onde tomar unes botelles de sidre, y ye que la ufierta de la nuesa bébora nos puestos de comida de la feria foi práuticamente testimonial.

Daqué paecío ta pasando nos actos oficiales/istitucionales, onde se suel faer referencia al gran llogru que supon l’algamar ser reconocíos pola UNESCO. Too perbién, pero cuando se procede al pinchéu posterior a les intervenciones, la sidre torna tar si non ausente, sí nidiamente marxinada. A la fin ufiértase cerveza y vinos gallegos y de La Rioxa -¿ignoren que los hai asturianos?- que se distribúin abondamente polos camareros y, si se quier sidre, hai qu’andar a la gueta d’ella y -si hai-, rogando por que mos echen un culete. Ye nidio que nun s’acaba de superar el complexu d’inferioridá asturianu.

Mesmamente, sigue tando ausente la sidre n’eventos como Bombstic, Metrópoli o Tsunami Xixón, ensin qu’a les nueses alministraciones paeza importa-yos, y lo que ye más significativo -ya inxustificable- n’eventos como’l Paseo Gastro, en Xixón, entamáu por Divertia hai vinu, cerveza y restu de bébores, pero non sidre.

Quiciabes seya’l momentu de pasar de les pallabres a los fechos.