Les II Xornaes de la Sidre de Ribeseya: tres selmanes d’actividaes pa cellebrar la cultura sidrera

Del 8 al 26 d’ochobre, Ribeseya va convertir el conceyu n’un escenariu sidreru, con llibros, esposiciones, talleres y xornaes de divulgación

LA SIDRA.- La asociación Entaína Ribeseya entama del 8 al 26 d’ochobre de 2025 les II Xornaes de la Sidre, un programa cultural que complementa la Folixa la Sidre y que busca reforzar la dimensión educativa, social y patrimonial de la cultura sidrera.
Les actividaes van cellebrase nel Centru Tito Bustillo y en seyes pueblos del conceyu: Collera, Cuerres, Santianes, Lloviu, Torre y Tereñes.

Una cita pa reforzar la identidá sidrera asturiana

Les II Xornaes de la Sidre nacen como complementu formativu y divulgativu de la Folixa, con una clara intención: convertir la sidra nun elementu d’identidá viva, presente tanto na tradición como na innovación.
Dende Entaína Ribeseya despliquen que “la sidra ye más que un productu; ye cultura, ye comunidá y ye una ferramienta d’educación social y ambiental”.

El Centru Tito Bustillo y los pueblos participantes van acoyer talleres y debates que xunen cultura, memoria, agricultura ya igualdá, reforzando’l papel de Ribeseya como epicentru de la cultura sidrera asturiana.

Programación oficial

• Miércules 8 (Collera)
  Presentación del llibru “La sidra, el ADN asturianu que diferencia col restu la Península”, de Salvador Ondó.
• Xueves 9 (Centru Tito Bustillo)
  Charra “Sidres parcelaries” por Edu Coto.
• Sábadu 11 (Centru Tito Bustillo)
  Naguración de la esposición “La Sidra de Papel”, de Fernando Paredano.
• Domingu 12 (Tereñes)
  Proyeición “Memoria fotográfica de la sidra d’Asturies”.
• Xueves 16 (Torre)
  Presentación del llibru “Toma un culín”, de Llucía Fernández.
• Vienres 17 (Centru Tito Bustillo)
  Taller “Mayando cola reciella” y demostración d’echar sidre a cargu de Laura Ovín.
• Sábadu 18 (Centru Tito Bustillo)
  Talleres d’ellaboración de sidre casero, de xelu y d’espolleta.
• Miércules 22 (Cuerres)
  Charra “Sidre y casería asturiana” con Manolo y Javier Niembro.
• Xueves 23 (Casa Social de Lloviu)
  Presentación del llibru “Muyeres qu’echen sidre”, de Susana Sela.
• Vienres 24 (Centru Tito Bustillo)
  Taller “Llanteru de pumar de sidra”, con téunicos de Campoastur.
• Sábadu 25 (Centru Tito Bustillo)
  Taller “Analís sensorial de la sidre”, dirixíu pola enóloga Cristina Castaño.
• Domingu 26 (Centru Tito Bustillo)
  Clausura de la esposición “La Sidra de Papel” y actu de zarru de les xornaes.