La Sidrería La Galana acoyó la entrega de los premios de la décimo séptima edición del Concursu Semeyes de LA SIDRA, un certame de renome internacional que recueye l’universu visual sidreru.
El rioxanu Eduardo San Vicente alzóse col Primer Premiu cola obra “Gotes que cunten hestories: escanciando tradición
LA SIDRA.- El Concursu Semeyes LA SIDRA ñació hai venti años, cuando entá naide falaba de Cultura Asturiana de la Sidre, cola intención de visibilizar y dar puxu al potencial artísticu y cultural de la sidre, un padremuñu visual que, a lo llargo de xeneraciones, quedó espeyáu en numberoses obres pictóriques asturianes cuyu llegáu el concursu quier continuar, anovándolu al traviés del llinguaxe fotográficu contemporaneu.
Asina lo remembró na so intervención Marcos A. Fernández, presidente de la Fundación Asturies XXI, na apertura del actu d’entrega de premios d’esta 18ª edición del Concursu de Semeyes de LA SIDRA. Fernández destacó cómo’l certame trespasó delles etapes a lo llargo d’estes casi dos décades, adaptándose a los cambeos na fotografía y al crecimientu d’interés que, güei sí, esperta la cultura sidrera dientro y fuera d’Asturies.
La entrega fízose’l pasáu 14 de payares na Sidrería La Galana, collaboradora del concursu dende los sos entamos y sede añal de la esposición de les obres premiaes y finalistes. La so implicación continuada recueye’l venceyu ente’l sector hosteleru y la promoción cultural de la sidre. Na ceremonia, guiada pol presidente de la Fundación Asturies XXI, Marcos Abel Fernández, tamién tan presentes Esther Freire, diputada na Xunta Xeneral, y Juan José Tomás, llagareru de Sidra JR, una presencia que subraya la importancia del sector productor nel desarrollu cultural del territoriu.
Organizáu pola Fundación Asturies XXI, col patrociniu del llagar Sidra JR y cola collaboración artística y técnica de la asociación Asemeyando, el concursu sigue afitándose, como amuesa la cantidá de países participantes y la diversidá de miraes que ufierten sobre la sidre. El númberu de participantes caltuvose en cifres asemeyaes a les de la edición pasada, cercanes a les trescientes semeyes procedentes d’unos venti países. Esti algame internacional da idega de la proyección del certame, que consiguió allugase ente les referencies principales dedicaes a la cultura sidrera dende l’ámbitu artísticu y fotográficu.
El xuráu tuvo presidíu pol fotógrafu asturianu Luis José Vigil-Escalera, ‘Lujó Semeyes’, Maestru de la Confederación Española de Fotografía y Excelencia FIAP, autor d’una trayeutoria expositiva y docente amplia y con numberoses distinciones en certámenes nacionales y internacionales. La so presencia al frente del xuráu reforzó la solidez artística d’esta edición, carauterizada por un altu nivel téunicu y una notable variedá temática dientro del mundu de la sidre.
El fotógrafu rioxanu Eduardo San Vicente alzóse col Primer Premiu —dotáu con 700 euros y cola Medaya d’Oru de la CEF— cola obra “Gotes que cunten hestories: escanciando tradición”, fecha durante una visita al llagar Sidra Herminio. La semeya amuesa a la cuarta xeneración de la familia sidrera, Danka Rodríguez, echando un culín dende’l tonel. El contrastre ente’l color de la sidre y el fondu en blanco y prietu, amás de xenerar una fuercia visual especial, subraya’l simbolismu del escanciáu, xestu que ye unu de los emblemes más reconocibles de la sidre asturiana. La unanimidá del xuráu evidenció la potencia narrativa de la obra y la so capacidá pa condensar n’una sola escena tradición, téunica y emoción.
El Segundu Premiu, con 200 euros y la Medaya de Plata de la CEF, foi pa Juan Carlos Hernández Fernández por “Siempres ta con nós”, una semeya tomada na Fiesta de la Sidre de Xixón. La niditú del pa y el so fíu en primer planu guía la mirada escontra una botella que s’alza ente la xente. La fusión del rayu de sidre col pelu del neñu y l’atmósfera cálida creada pola iluminación produz un efeutu casi oníricu, evocando la presencia constante de la sidre tantu nos momentos familiares ya intimos comu festivos de la vida asturiana.
El Tercer Premiu, con 100 euros y la Medaya de Bronce de la CEF, foi concedíu a Francisco J. Domínguez García por “Sidre cardiosaludable”. Con un plantegamientu minimalista basáu na relación ente lluz, solombra y color, les botelles sobre fondu verde tracen una llinia asemeyada a un electrocardiograma. La forma central, más pronunciada y construyida al traviés de la superposición vertical de botelles, lleese como un “baltíu sidreru”, un recursu visual que da a la obra una dimensión simbólica bien marcada.
La Mención Especial “Sidra JR”, con 100 euros y dos caxes de Sidra JR, foi pa Óscar Chamorro Flórez por “Llavaderu de botelles”, una semeya en blanco y prietu centrada nel procesu de llaváu y reutilización de botelles. La so fuercia ta na textura del vidriu moyáu, la repetición de formes y el calter casi industrial d’una escena esencial nel ciclu productivu de la sidre.
Al mesmu tiempu inauguróse la esposición coles venti semeyes finalistes, que va poder visitase tol mes na Sidrería La Galana antes de viaxar al Museu de la Sidre d’Asturies (Nava). Dende ellí va entamar el so percorríu por distintos llugares, n’un itinerariu que yá ye seña d’identidá del concursu. A lo llargo de 2026, la muestra itinerante “Semeyes de LA SIDRA” va visitar diverses ciudaes europees integraes na rede Cider Cities, reforzando los venceyos culturales ente territorios sidreros y ampliando la difusión del padremuñu sidreru asturianu más allá de les fronteres. El concursu y les esposiciones venceyaes cunten col sofitu del llagar Sidra JR y cola subvención de la Conseyería de Cultura, Política Llingüística y Esporte del Principáu d’Asturies, qu’impulsa la promoción del padremuñu sidreru como espresión viva de la identidá asturiana.
