Xornada téunica de la sidre DOP

Güei, de 17 a 19 hores cellebraráse en La Felguera una Mastreclass Sidre d’Asturies con Denominación d’Orixe.

LA SIDRA.- Col enfotu d’afondar na conocencia de la sidre DOP pa da-y puxu al so consumu, el CR DOP Sidre d’Asturies, en collaboración con OTEA,y la Sociedá de Festexos y Cultura “San Pedro” tien entamao pa güei una xornada téunica pa los hosteleros asturianos p’aidalos a conocer aspeutos clave de la Sidre DOP como son el serviciu, la conservación del productu, la téunica del echáu, los factores qu’inflúin na sidre, la carauterización de la sidre DOP o aprender a estremar los defeutos de la sidre, asina como sensibilizar alrodiu de los aspeutos positivos qu’acompanguen al so consumu.

Nos tiempos caberos, dende’l CR DOP Sidre d’Asturies ta faciendose un perimportante esfuerciu pa dar a conocer y poner en valor esta marca de calidá ente la sociedá asturiana en xeneral y ente la hostelería del país en particular, atalantando qu’una mayor conocencia de la mesma lleva apareyao una mayor calidá del serviciu y de l’apreciación de la mesma, lo que supondrá un xorrecimientu del so consumu.

La Masterclass Sidre d’Asturies con DOP sedrá impartía por Pedro Ramas nel llocal de la Sociedá de Festexos na cai Pintor Paulino Vicente, nº2 de La Felguera, n’horariu de 17 a 19 hores.