Dempués de la xunta celebrada ayeri polos xuraos que decidieron los internacionalmente prestixosos Premios SISGA, güei ye’l gran día cola Preba Abierta al Publicu de les sidres participantes, que tendrá llugar nel Palaciu de Congresos de la Feria de Mueses.
LA SIDRA – El XV Salón Internacional de les Sidres de Gala (SISGA) sigue col so programa cargáu d’actividaes. Hasta’l momentu, la delegación internacional visitó yá los llagares de JR y Cortina, el Museu de la Sidra d’Asturies, la sede de Crivencar, onde conocieron los Alimentos del Paraísu y dellos chigres asturianos. Tamién asistieron a una tastia de sidre irlandesa y otra xaponesa, recibieron una clase práctica d’echar sidre impartía pol campeón Sub 25 del Campeonatu d’echadores, Amauris La Pauta, participaron n’alderiques sobre l’actualidá sidrera y reflexonaron tocante a la meyor manera d’afitar un turismu caltenible venceyáu a la sidre, l’ellaboración de nuevos productos y munchos otros asuntos.
Estes xornaes valieron pa crear venceyos personales y comerciales, pero sobre too pa conocer y esfrutar de la Cultura Asturiana de la Sidra.
Güei toca presentar los sos productos: 236 sidres en total que van tar al algame del públicu nuna preba abierta. Ellí van poder probase les sidres, falar colos productores, participar en tasties guiaes y maridar les meyores sidres colos Alimentos del Paraísu.
Mañana pondráse’l ramu al eventu cola entrega de los Premios SISGA nel Brunch de Gala que tendrá llugar na Finca El Duque.
