El 3 de xunu tornó convertise ayeri nuna fecha destacada pal sector sidreru y pa miles d’amantes de la bébora patria asturiana. El Díi Mundial de la Sidre, celebráu cada añu nesta xornada, sirvió una vegada más pa reivindicar la importancia cultural, social y económica de la sidre tanto n’Asturies como n’otres rexones productores del mundiu.
La edición d’esti añu tuvo una relevancia especial n’Asturies, que cellebra’l segundu Díi Mundial de la Sidre dempués de que la Cultura Sidrera Asturiana fuera reconocida pola UNESCO como Padremuñu Cultural Inmaterial de la Humanidá en payares de 2024. Esta declaración convirtió la cultura venceyada a la sidre nun padremuñu de valor universal y dio un nuevu impulsu a les acciones de promoción y divulgación.
Per tol país desarrollóse una amplia programación con más d’una ventena d’actividaes culturales, divulgatives y gastronómiques. Hubo actos n’Uviéu, Xixón, Nava, Siero, Colunga, Ribeseya, Teberga y otros conceyos, amás d’una acción promocional en Madrid destinada a dar a conocer la cultura sidrera asturiana fuera’l país.
Ún de los actos más visibles celebróse n’Uviéu, onde tuvo llugar un escanciáu simultáneu na plaza de la Catedral. Según informó RTPA, repartieronse 400 vasos y botelles de Sidra d’Asturies DOP nuna cellebración abierta al públicu. Nel mesmu actu, el presidente del Principáu, Adrián Barbón, reivindicó la cultura sidrera como una de les grandes señes d’identidá d’Asturies.
La hostelería sumóse tamién a la cnmemoración al traviés de les V Xornaes Gastronómiques del Díi Mundial de la Sidre, con establecimientos que prepararon platos y propuestes especiales onde la sidre foi protagonista.
La cellebración nun se llimitó a Asturies. El Díi Mundial de la Sidre, impulsáu internacionalmente dende hai años, busca reunir cada 3 de xunu a productores, establecimientos y consumidores de sidre de distintos países. La xornada sirve pa dar visibilidá a la diversidá de estilos y tradiciones sidreres esistentes n’Europa, América y otros territorios onde esta bebida forma parte de la so cultura.
Nesti contestu, Asturies llega a la cellebración nun momentu especialmente favorable. El reconocimientu internacional de la UNESCO, el xorreciente interés turísticu pola cultura sidrera y la proyeición ca vegada mayor de la sidre asturiana nos mercaos esteriores convierten al país nún de los grandes referentes mundiales d’esta bébora.
Ayeri, una vegada más, miles de persones alzaron el vasu pa brindar pola sidre y por una cultura que sigue viva, evolucionando y proyeutándose al mundiu ensin perder les sos raigaños.
