Pa esti branu, la dieta atlántico

Los elementos que la componen, comu la sidre, tienen múltiples beneficios pa la salú.

LA SIDRA.- Paeciera que nun hai namás saludable que la dieta mediterránio nestos díis; sicasí, ca vuelta más estudios siñalen a la dieta atlántico comu una de les meyores formes d’alimentase pa caltenese saludable. Ente los elementos que lu componen tán los llácteos, la xata, la güerta, los cereales, el pexe o’l mariscu.  ¿Y de bébora? Pos, como nun podría ser d’otra miente: la sidre. El consumu d’esti productu resulta bien beneficiosu siempres y cuandu se beba de forma moderao. Apurre antiosidantes, aída a prevenir malures coronaries y tamién a la eliminación del ácidu úricu; pue contribuyir a controlar la glucosa nel sangre, tien altu conteníu en pectina lo qu’aída a qu’el nuesu aparatu circulatoriu furrule meyor, y munches coses más. Amás cumple una función prebiótica, yá qu’estimula cambios nes bacteries amistoses’ que tenemos nel estantín gruesu lo que favorez l’absorción de nutrientes. 

Pola so propia sencia, ye una bébora natural, ensin dengún tipu d’aditivu y que n’Asturies, la forma d’ellaborala caltúvose dende l’antigüedá. Y pa tolos que tean en plena “operación bikini”, la sidre, ensin dulda, ye una aliada. Amás de tener baxa graduación alcólica y per ende tener menos caloríes qu’otra triba de bébores, favorez al nuesu metabolismu, tien freba y ye diurético evitando la retención de llíquidos. Tou esto fai que la sidre seya la bébora por escelencia dientru la dieta atlántico, un réxime del que vamos escomenzar a escuchar ca vuelta más.