La xornada del 3 de xunu va tar acompañada por más de venti actividaes culturales, divulgatives y gastronómiques, con actos en distintos conceyos y la participación del sector hosteleru al traviés de les V Xornaes Gastronómiques impulsaes por OTEA n’Uviéu
LA SIDRA.- La cultura sidrera asturiana torna cellebrar esti 3 de xunu’l Díi Mundial de la Sidra, una cita que gana pesu tres la declaración de la Cultura Sidrera Asturiana como Padremuñu Cultural Inmaterial de la Humanidá pola UNESCO. La programación inclúi más de venti actividaes repartíes per estremaos puntos d’Asturies, con propuestes culturales, divulgatives, musicales y gastronómiques que busquen poner en valor tolos elementos que formen parte d’esti patrimoniu vivu.
La iniciativa va permitir asistir a esposiciones, alcuentros divulgativos, proyeiciones, talleres y actuaciones musicales empobinaes a dar a conocer los distintos elementos que formen parte del padremuñu sidreru. Ente les propuestes anunciaes figura “Doce maneres de cantar a la sidre”, una actividá de la Biblioteca Pública Ramón Pérez de Ayala que recueye cantares y tonades dedicaes a la sidre al traviés d’una fonoteca dixital accesible con códigos QR.
Tamién van desendolcase actividaes específiques en dellos equipamientos culturales. El Centru del Prerrománicu Asturianu va acoyer un taller de cosmética sidrera, mentes que LABoral Centru d’Arte y Creación Industrial va entamar un llaboratoriu d’esperimentación plástica inspiráu nos collores de la sidre.
Nava tornará ocupar un llugar central na xornada con un actu simbólicu d’echaú de sidre previstu pa les doce del mediudía del día 3 dellantre’l Muséu de la Sidre d’Asturies. L’actu cuenta col sofitu de la FACC, la Fundación de la Sidre y el Conseyu Regulador de la DOP Sidre d’Asturies.
La hostelería va sumase tamién a la cita. OTEA y l’Ayuntamientu d’Uviéu promueven les V Xornaes Gastronómiques del Día Mundial de la Sidre, que se desendolquen ente’l 1 y el 7 de xunu. Más de trenta establecimientos de la capital van ufiertar platos, menús y tapes nes que la sidre va tener un papel protagonista, incorporando ellaboraciones tradicionales y otres propuestes de cocina actual.
La selmana rematará con una de les cites más populares del calendariu sidreru: la XXVI Preba de la Sidre de Gascona, prevista pal domingu 7 de xunu. El programa inclúi xornaes gastronómiques, una preba de sidre artesana, el Concursu Oficial d’Echaores, actuaciones musicales, bandes de gaites y la tradicional tastia popular de les primeres sidres de la temporada.
L’actu institucional principal va cellebrase nel Paraninfo de la Laboral, con una mesa redonda dedicada a la cultura sidrera na que van participar investigadores, especialistas y representantes del sector. La cita forma parte de les acciones impulsaes pol Gobiernu d’Asturies pa reforzar la proyección nacional ya internacional d’un padremuñu que la UNESCO reconoció pol so valor cultural, social y identitariu.
La comemoración del Díi Mundial de la Sidre consolídase asina como una fecha de referencia pa reivindicar non solo la bebida, sinón tamién los llagares, les pumarades, l’echáu de sidre, la tradición oral y los espacios de convivencia que formen parte d’una de les mayores señes d’identidá d’Asturies.
