La sidre asturiano tien Talent

Wilkin Aquiles, Campión d’Echadores del caberu Campionatu, lleva’l so arte a les pantalles de tol Estáu nel programa Got Talent

Lo que menos esperaben los xuraos del popular concursu Got Talent, al ver a un dominicanu nel escenariu, yera ver traer unes botelles de sidre… y una escalera. Y ye que, comu diz d’avezu el so compañeru de profesión Salvador Ondó, “un asturianu ñaz onde-y da la gana” y Wilkin quiso ñacer na República Dominicana.

Pasá la primer sospresa, el retu de Wilkin Aquiles consistía n’echar 6 culinos perfechos, un llogru que comu sabeis namás se consigue de xemes en cuandu incluso pente los meyores de los concursos d’Echaores. El tres vegaes campión consiguiolo, al milímetru, impresionando a los espectadores y doblando l’apuesta al echar los siguientes culinos dende un altor d’1’60, mangáu enriba una escalera. Nun se pue escaecer la dificultá estra de facelo delantre les cámares y d’un públicu tan numberosu comu desixente. 

La so actuación non solo valió pa demostrar otra vuelta’l so talentu, sinón pa dar una perbona imaxe de la sidre asturiana y esparder esa importante parte de la Cultura Asturiana que ye l’echar bien la sidre. Un movimientu que probablemente, teniendo’n cuenta’l númberu d’espectaores d’esi programa, valga más que munches campañes de promoción.

Vaiga dende LA SIDRA un aplausu bien ganáu que se sumen a los recibios nel plató.