La cultura sidrera asturiana, afitada como candidata a Padremuñu Mundial Inmaterial de la Unesco

Tres el fiascu que supunxo la non toma en considerancia pola Unesco de la candidatura presentada esti añu, el Conseyu de Padremuñu Histório Español –el ‘Principado’ tampoco nun tien competencies pa presentala por elli mesmu- confirma que tornará presentala en marzu de 2023 énte la Organización de les Naciones Xuníes pa la Educación, la Ciencia y la Cultura (Unesco) pa la so declaración como Padremuñu Mundial Inmaterial.

LA SIDRA,. Ello ye que’l Conseyu de Padremuñu designara yá va un añu la cultura sidrera asturiana como candidata pa entrar a formar parte de la Llista Representativa del Padremuñu Mundial Inmaterial, pero nun foi tomada en considerancia pola Unesco.

Dende’l ‘Principado’ xustifiquen el fiascu a que “la normativa de la Unesco torgó que fuera evaluada nel ciclu 2022-2023  por cuenta de qu’establez un cupu añal de 55 candidatures a estudiar del total de les presentaes, amás de conceder preferencia a aquelles naciones poco o nada representaes nuna Llista de Padremuñu Mundial Inmaterial na qu’España cunta yá con 20 ellementos inscritos”. Afirmando qu’ello faía imposible que la cultura sidrera asturiana llegar a ser siquier evaluada.

Trátase d’una xustificación un tanto estraña que lleva a entrugase’l motivu pol que se presentó dicha candidatura esti añu, siendo tan evidente pal ‘Principado’ la ‘imposibilidá’ de que fuera tenida nin siquier en considerancia, y muncho menos les declaraciones optimistes feches nel momentu de presentar la candidatura

El casu ye que, el tortuosu procesu sigue allantre diez años dempués d’empecipiar, y l’añu que vien va presentase un nuevu espediente téunicu que s’espera –agora sí- que seya teníu en considerancia y aprobáu definitivamente, lo que supondríe una reafirmación identitaria de primer orde p’Asturies, ya impulsar la industria de la sidre, la mazana y el sidraturismu.