Entamu

Escomienza esti mes de xunu con una impresionante convocatoria d’actividaes, acumulándose —y coincidiendo nel tiempu— eventos sidreros de primer orde a los que ye bien difícil renunciar, y que amuesen la pervitalidá de la cultura sidrera asturiana.

Nestes postreres selmanes fueron protagonistes Muñó, L’Entregu, Sirviella, Carbayín… y Gascona, que non solo destaca pol so importante poder de convocatoria, sinón qu’esti añu cellebró la so primer ‘Preba’ de sidre casero, qu’entamó con bon pie y a la que-y auguramos un futuru impresionante.

Tamién ye bien importante la renovación del Conseyu Regulador de la DOP, col nomamientu de Jorge García como presidente y de José Luis Piñera como vicepresidente; y fundamental el so apueste por caltener polítiques d’entendimientu y unidá ente pumareros y llagareros.

Amás, esti mes va cellebrase’l XIV Salón de la Sidre DOP, un referente obligáu pa tolos amantes de la sidre asturiana, onde se presenten les nueves sidres acoyíes a esta marca de calidá.
Hai que destacar tamién que’l denomináu ‘Díi Mundial de la Sidra’, aniciáu n’Alemaña hai unos doce años, va afitándose n’Asturies, como rempuesta a la necesidá social d’espresar l’orgullu que sentimos pola nuesa bébora patria, entá más agora que cunta col reconocimientu internacional que-y otorga la UNESCO.

Esti añu, inclusive, implicóse’l mesmu ‘Principado’, qu’aprovechó la ocasión pa convocar una riestra actividaes rellacionaes cola cultura sidrera asturiana y pa que los sos conseyeros fixeren declaraciones illusionantes y anunciaren actuaciones esperaes. Eso sí, nun futuru inciertu entá por concretar.

Y ente que too esto va pasando, l’ambiente sidreru sigue meyorando. Sidreríes, merenderos, xornaes de sidre casero, fiestes de prau,… too va a más, ¡y atentos, que pal mes que vien ya tenemos el Festival de la Sidre de Nava! referencia obligada pa tolos amantes de la sidra.

No que nun se progresa, nin tien pinta d’ello, ye na solución de la reinal carencia de mazana asturiana, nel reconocimientu llaboral de la figura del echaor, na aplicación llegal de lo que ye una sidrería, nin, por supuestu, nel indispensable Plan Estratéxicu de la Mazana y la Sidre.