El númberu d’Avientu de LA SIDRA acueye un trabayu de gran valir etnográficu y cultural dedicáu a los llagares caseros de Ribedeva, el conceyu más oriental d’Asturies onde entá se fae sidre. L’artículu amuesa un territoriu singular, asitiáu pente la mar y la montaña, nel que la sidre nunca foi industria, pero sí una práutica doméstica fondamente enraigonada.
El reportaxe fai un percorríu pola memoria sidrera del conceyu, poniendo’l focu nes persones que, pali que pali, caltuvieron vivos los llagares caseros. Llagares antiguos y modernos, cuadraos o reondos, fechos con inventiva y pacencia, que cunten una hestoria distinta a la de los grandes conceyos productores, pero non menos importante p’atalantar la cultura sidrera asturiana.
Ribedeva apaez como un espaciu de contrastes: tierra d’indianos, de zapateros mansoleos y d’emigración, con grandes casones y palacios que, munches vegaes, tamién afitaron llagares pa ellaborar la sidre que se consumía na casa y se compartía colos vecinos. Esa sidre, ensin etiquetes nin mercáu, foi parte del ciclu vital de les families y del día ente día del conceyu.
El trabayu destaca tamién cómo munchos d’esos llagares sumieron col pasu del tiempu, pola perda de población y los cambeos sociales, pero amuesa qu’inda güei queda una rede discreta de llagares vivos, calteníos pola convicción de que la sidre nun tien por qué ser industria pa tener valir. Son espacios pequeños, pero cargaos de memoria, que representen una ayalga cultural de primer orde.
Esti artículu de Susana Sela enártase dientru’l trabayu d’investigación de la Fundación Asturies XXI, una entidá comprometida col estudiu, difusión y caltenimientu de la cultura sidrera asturiana, y cunta col sofitu de la Conseyería de Cultura, Política Llingüística y Deporte del Principáu d’Asturies, dientru les sos llinies de sofitu a proyeutos culturales y de normalización llingüística.
En resume, el reportaxe sobro los llagares de Ribedeva ye una invitación a mirar acullá de los grandes nomes y a reconocer el valir de la sidre casero como parte esencial del padremuñu cultural asturianu. Porque, como bien se recuerda nes sos páxines, el padremuñu, si se curia, nun muerre: formienta, alienda y espera. Como la sidre mesma.
