LA SIDRA – Nel actu participaron la conceyala de Desendolcu Llocal de Villaviciosa, Rocío Vega; el presidente del Conseyu Regulador de la DOP Sidra d’Asturies, Jorge García; Carme Pérez Antolín, en representación de la editorial Espublizastur; y la propia Llucía Fernández
Muyeres qu’echen sidre ye la cabera espublización asoleyada pola editorial Espublizastur dientro de la so coleición Cimbriella, dedicada a la sidre. El volume recueye los testimonios de 33 muyeres que curien de los raigaños de la sidre nes pumaraes asturianes, aportando una mirada coral sobre un trabayu esencial y poco reconocíu.
La obra complementa otros títulos de la mesma coleición, como Muyeres del llagar y el primer Muyeres qu’echen sidre, encadarmando una triloxía que permite pescanciar la importancia y la presencia constante de la muyer na cultura de la sidre d’Asturies dende los sos anicios. El llibru combina los testos de Llucía Fernández coles imáxenes del fotógrafu Luis José Vigil-Escalera, Lujó Semeyes, reforzando’l valor documental y cultural del proyectu.
“Ensin pumares, nun hai Cultura Asturiana de la Sidra que valga”. Con esta idea como fondu, Llucía Fernández preslló la so intervención na presentación de ‘Pumareres. Muyeres del pumar’ nel Ateneu Obreru de Villaviciosa, onde reclamó un compromisu firme de consumidores, hosteleros, llagareros y autoridaes col consumu, la ufierta y la producción de sidre fecho con mazana asturiana.
L’autora apeló tamién a la responsabilidá de les istituciones pa velar pol padremuñu cultural sidreru y garantizar una rentabilidá xusta a lo llargo de tol procesu productivu.
Pela so parte, el presidente de la DOP aporfió na importancia de visibilizar el trabayu de les muyeres venceyaes a los pumares y del mundiu rural en xeneral, agradeciendo a la Fundación Asturies XXI, impulsora de la iniciativa, el reconocimientu fechu a estes pumareres.
Tres de la presentación, caúna de les muyeres participantes recibió un exemplar del llibru firmáu pola autora. L’actu presllóse con una semeya de familia y un brindis con sidre brut DOP.
La obra cunta col sofitu de la DOP Sidre d’Asturies y del Conceyu Xixón.
