Contrueces (Xixón), Germán (Avilés), La Morena (Viella), Piñera (Xixón), Vallina (Sieru) y Roza (Nava) son los llagares que pasen a la final de la Meyor Primer Sidre l’Añu, que tendrá llugar el miércoles 25 de marzu na Montera Picona de Ramón
Nesta edición, cerca de trenta llagares presentaron les sos sidres a concursu, confirmando’l puxu y bon momentu del sector. A lo llargo de la mañana, el xuráu realizó una duple tastia a ciegues, un procesu rigorosu que dio como resultáu la escoyeta de los finalistes.
El xuráu tuvo compuestu polos sumilleres Xuacu Menéndez y Eugenia Castiello, xunto colos profesores Juan Luis García y Benedicta Furro ya’l propietariu la Montera Picona de Ramón, Emilio Rubio, baxo la presidencia de José M. Busto, garantizando un altu nivel de conocencia y esixencia na valoración. Los encargaos d’echar la sidre foron Wilkin Aquiles y Alejandra Vanegas.
Los llagares que pasen a la final son: Germán (Avilés), La Morena (Viella), Contrueces (Xixón), Piñera (Xixón), Vallina (Sieru) y Roza (Nava), toos ellos con sidres de gran nivel que faen prever una final mui reñida.
La final va celebrase a les 18:30 hores na Sidrería La Montera Picona de Ramón, onde’l sistema volverá ser de tastia a ciegues en duple ronda. Les tasties y deliberaciones del xuráu van ser abiertes al públicu, cuntándose amás cola presencia de los llagareros finalistes.
Amás del primer premiu —que convierte a la sidre ganadora na sidre oficial de la Primer Sidre l’Añu, que se cellebra del 17 al 20 d’abril— entregaránse reconocimientos al segundu y tercer clasificaos. Una vegada finalizáu’l concursu, el públicu podrá probar les sidres finalistes.
Esti certame, entamáu pola Fundación Asturies XXI, ye ún de los concursos más importantes del país y destaca por ser l’únicu que valora la sidre sobre la madre, esto ye, ensin trasegar, y el segundu en númberu de llagares participantes.
Sidre sobre la madre
Dende hai munchos años, LA SIDRA y la Fundación Asturies XXI trabayen pola recuperación de la sidre ensin trasegar, una triba que práuticamente desapareciera col procesu d’industrialización de los llagares. Anguaño, cada vez son más los productores que s’animen a ellaborar y comercializar esta sidre, devolviendo protagonismu a una tradición histórica.
