La ciudá húngara de Pécs acoyó’l pasáu 18 d’abril la primer edición de Cider Salon Hungary, un eventu que nació como la versión centroeuropea del reconocíu Salón Británicu de la Sidra.
Tres l’éxitu de la edición de Londres, celebrada’l 24 de mayu, los organizadores llanzáronse a la aventura n’Hungría pa acoyer sidres internacionales de calter más continental, munches vegaes grandes desconocíes.
El Hungary Cider Salon tuvo llugar nel históricu Littke Pezsgőház, onde mientres una xornada completa axuntáronse productores, espertos y aficionaos llegaos de distintos puntos d’Europa. La llocalización nun ye casual, yá que baxo la ciudá de Pécs atópense 50 km de túneles soterraños que daten de les invasiones otomanes (1.527 el más antiguu) y onde dende 1.859 ellabórase sidra achampanada, siendo la última producción en 2.023.
L’alcuentru presentóse como un nuevu espaciu de referencia pa la cultura sidrera n’Europa Central y del Este, combinando tasties, formación y actividaes divulgatives arredor d’esta bébora tradicional, amás de visites guiaes a pumarades.
Ún de los aspeutos más destacaos del eventu foi la amplia representación internacional. Más de venti productores ufiertaron los sos productos, con participación de cuasi tola escena sidrera húngara, asina como ellaboradores procedentes de países como Eslovaquia, Croacia, Serbia, Bosnia, Moldavia, Austria, Alemaña, Italia, Suecia, Noruega, Francia, Inglaterra y, por supuestu, Asturies.
El públicu húngaru pudo probar alredor de 60 sidres internacionales xunto coles esplicaciones de los propios productores, conversar colos profesionales del sector, conocer de primer mano los procesos d’ellaboración, les carauterístiques de los pumares, el conceutu de la pumarada y les histories que s’atopen detrás de cada sidra y la particular cultura sidrera de cada país.
Les sidres presentaes yeren bastante uniformes en cuanto a la so alta calidá, pero con una amplia variedá d’estilos, sabores y téuniques, destacando les sidres achampanaes sobre les sidres de mesa y primando los aspeutos secos sobre los ácidos o dulces.
El formatu del salón pensóse pa favorecer el contautu direutu ente públicu y productores, asina como la crítica constructiva o feedback de los distintos productos, yá fora sidra, sidra de pera o aguardiente de sidra (pálinka n’húngaru). Amás, cada visitante recibió una copa de cristal esclusiva del eventu, diseñada específicamente pa la tastia y que pudo caltener como recuerdu.
Nesta primer edición, la presencia asturiana tuvo un papel destacáu. La Fundación Asturies XXI cuntó con stand propiu, reforzando la so llabor de promoción de la cultura sidrera asturiana a nivel internacional.
Asina mesmo, la Revista LA SIDRA despertó un notable interés ente los asistentes gracies a la so exhibición tradicional del escanciáu, que captó l’atención del públicu centroeuropeu.
Amás de la llabor divulgativa de cara al públicu, la delegación asturiana foi entrevistada pa un documental húngaru sobre la sidra, nel que se punxo especial atención nel Salón Internacional de les Sidres de Gala y, por supuestu, nel creciente éxitu y proyección internacional de la Red Europea de Ciudades de la Sidra.
Los organizadores señalaron que l’oxetivu de Cider Salon Hungary ye consolidar un nuevu puntu d’alcuentru pal sector, dar visibilidá a productores emerxentes y estrechar llazos ente les rexones sidreres tradicionales y los nuevos territorios productores, calteniendo una mente abierta respeuto a lo que se pue facer cola sidra de mesa y achampanada ensin perder la calidá y la identidá.
Con esta propuesta, Hungría sumóse al mapa internacional de grandes eventos dedicaos a la sidra, nuna cita que aspira a medrar nos próximos años y a convertise nun referente dientro del calendariu européu. Nun futuru cercanu, ye posible qu’esti eventu pueda acercase al públicu asturianu nuna próxima edición del SISGA en Xixón.
Salú / Egészségére!
