La sidre artesano tornará a ser protagonista na cai Gascona d’Uviéu cola cellebración de la II Preba de la Sidre Artesano, una cita que tendrá llugar esti sábadu 6 de xunu ente les 12:00 y les 15:00 hores dientru’l programa de la XXVI Preba de la Sidre.
LA SIDRA.- L’actividá ta entamada pola Federación Asturiana de Sidre Casero (FASCAS), en collaboración cola Asociación de Gascona, y xuntará a más d’una docena d’asociaciones venceyaes a la federación, representatives d’otros tantos conceyos asturianos. L’oxetivu ye dar a conocer el trabayu que desendolquen estos colleutivos na ellaboración de sidre casero y artesano, una tradición que sigue viva per toa Asturies.
Los asistentes van poder degustar distintes sidres ellaboraes poles asociaciones participantes, ente les que se cuenta’l Club Sierense d’Amigos de la Mazana (CSAM), una de les entidaes fundadores de FASCAS. La muestra va permitir conocer la variedá d’estilos y carauterístiques que presenta la sidre artesano que se produz nel país, frutu del trabayu de cientos d’aficionaos y productores qu’apuesten pola calidá y pola conservación de les formes tradicionales d’ellaboración.
La II Preba de la Sidre Artesano consolídase asina como un espaciu propiu dientru les actividaes de Gascona, dando visibilidá a un movimientu que, nos postreros años, ganó presencia y organización alredior de la Federación Asturiana de Sidre Casero -FASCAS-.
L’actu forma parte del programa de la XXVI Preba de la Sidre, que se cellebra del 5 al 7 de xunu na cai Gascona d’Uviéu y que rematará’l domingu cola tradicional degustación dedicada a la sidre industrial.
