Dos emigrantes asturianos en Cuba, 1885. Archivu Históricu de Valle, Ballina y Fernández. Imaxe de la esposición de la Fundación Asturies XXI.
La Fundación Asturies XXI recupera la memoria gráfica de la sidre n’América con un llibru, una esposición virtual y una muestra itinerante que se nagurará prósimamente en Bimenes.
La sidre viaxó coles persones qu’emigraron d’Asturies y ayudó a caltener los venceyos cola tierra. Esa rellación ente memoria, identidá y cultura sidrera ye’l centru de «La sidre na emigración asturiana. Memoria gráfica d’una cultura compartida», el proyeutu de la Fundación Asturies XXI que recueye testimonios de los sieglos XIX y XX.
Semeyes que cunten la historia de la emigración
La iniciativa reúne semeyes históriques, cartelos, etiquetes y documentos. El resultáu pue consultase nun llibru de 48 páxines y nuna esposición virtual de venti pieces, acompañaes d’una cronoloxía y un mapa. La propuesta complétase con una muestra itinerante de venti semeyes de 70 por 100 centímetros, pensada pa instituciones, asociaciones y centros educativos.
El percorríu inclúi una imaxe mexicana de hacia 1870, con una botella de sidre na mesa d’un escribanu; un retratu de dos emigrantes asturianos en Cuba, en 1885; y una xira de la Juventud de Cuideiru en La Habana, en 1917. Son escenes que documenten la presencia de la sidre na vida cotidiana y nes celebraciones de les comunidaes emigrantes.
L’embarque de sidre nel muelle de La Espuncia, en Villaviciosa, hacia 1920, amuesa tamién la dimensión comercial. Los anuncios y les etiquetes permiten siguir la rellación de los llagares asturianos colos mercados americanos y les persones que buscaben caltener les sos costumbres al otru llau del Atlánticu.
Prósima inauguración en Bimenes y sofitu institucional
La muestra itinerante naguraráse prósimamente en Bimenes. El proyeutu cuenta con una subvención del Gobiernu del Principáu d’Asturies, al traviés de la Conseyería de Presidencia, Retu Demográficu, Igualdá y Turismu. Nos créditos figuren tamién los ayuntamientos de Nava y Bimenes, CiderCities European Network, LA SIDRA, el CIFP Hostelería y Turismo, FASCA, la Cátedra Sidra d’Asturies, la Escuela de Sumillería de Sidre de la Fundación Asturies XXI y la Fundación GijónRural.
Los fondos proceden de museos, archivos y colecciones particulares. La iniciativa sigue abierta a semeyes familiares, cartes, factures y otros documentos que permitan ampliar esta memoria compartida.
La esposición virtual y el llibru puen consultase na web de la Fundación Asturies XXI, onde tamién s’esplica cómo apurrir materiales o solicitar la muestra itinerante.
