Sicera 2016

LA SIDRA participará na amuesa de la mazana y la sidre de los Alpes italianos.

LA SIDRA.- La fin de selmana del sábadu 8 y domingu 9 d’ochobre, desendolcaráse SICERA, l’eventu sidreru más importante d’Italia, que tien llugar na llocalidá d’Antey-Saint André, a los pies del Matterhorn-Monte Cervino.

A lo llargo de les dos xornaes ta previsto cellebrar una mononera d’actividaes ente públiques y oficiales. Na tardi-nuechi del sábadu llevaráse a cabu la Segunda Conferencia Internacional de la Sidre d’Italia, a la que ta previsto qu’asista l’estudiosu canadiense de la sidre Claude Jolicoeur, y que se complementará con una cena oficial, basada na gastronomía de la mazana y un espeutáculu de dancia tradicional.

El domingu, de magar les nueve la mañana, y en cuatro escenarios diferentes asitiaos a lo llargo tol pueblu, habrá un mercáu tradicional rellacionáu col mundiu la mazana y los productos de la tierra, nel que tamién habrá un espaciu pa la degustación de sidre nacional ya internacional, tando previstes conferencies sobro la sidre y el mundiu de la gastronomía slow food, una xinta tradicional alpina, espeutáculos de les rexones hermanaes, degustación de dulces tradicionales de mazana, amás d’un matasellos especial de correos pa los aficionaos a la filatelia y esposiciones de los neños del pueblu..

Na organización yá tienen confirmao la participación de llagareros procedentes de varies rexones del norte d’Italia, asina comu d’Austria, Alemaña, Irlanda, España, Holanda, Francia, Xapón y los Estaos Xuníos.

Y ente ellos tamién tará presente LA SIDRA, al traviés del nuesu collaboraor Donato Xuaquín Villoria, qu’ufrirá una preba de sidre asturiano énte los asistentes y cubrirá la información de tolos actos de Sicera ’16.